Ehangano lyoRossing Uranium olyi li metifa okulongekidha okweenda nokumatuka iinano ya yooloka, hoka taku ka kala ko momasiku gaheyali ga Maalitsa nuumvo.
Ehangano ndyoka lyoRossing Uranium olya shanga kutya otali ka ninga iinyangadhalwa mbyoka melongelokumwe nehangano lyoCancer Association.
“Otatu ka topola iinyangadhalwa mbika ngaashi okweenda oshinano ookilometa ntano, hoka taku ka tameka potundi 09h00,” ya shanga ngaaka.
Taya ti, okwiishangitha okwa eguluka sigo 08h30, momasiku ngoka gaheyali.
Rossing Uranium ota hiya oshigwana opo shi ka kuthe ombinga mokweenda esiku ndyoka.
Esiku olyo tuu ndyoka otaku ka kala okumatuka, okwiinyolitha otaku hulu momasiku gahamano gaFebuluali.
“Okumatuka hoka okwa topolwa miinano ookilimeta 10, 21,1 osho wo 42,2 ihe kehe gumwe ota ka matuka ashike oshinano shoka a inyolitha,” ya shanga ngaaka.
Oha hiya oshigwana opo shi ka kuthe ombinga okumatuka, okuxwepopaleka uundjolowele wawo.
Aakuthimbinga aakulu yoSwakop Uranium Anna Armas osho wo Jesaya Matheus oya ti oya ilongekidha oku ka matuka esiku ndyoka notaya hiya oshigwana shi ye shi ka ya kondjithe momathigathano ngoka.
Yamwe yomiilyo yomutumba gwopashigwana mekwatelokomeho lyaminista gwelongo, aanyasha, omaudhano noonkulunkedhi Sanet Steenkamp osho wo omupeha gwe Dino Ballotti, oya li ya yambidhidha nokukutha ombinga momadhewo koFITCITY Namibia koWindhoek oshiwike sha zi ko.
FITCITY Namibia ehala lyomadhewo ndyoka lya li lya ningi oshinyangadhalwa pamwe nuuminsteli womaudhano okweeta oshigwana pamwe nokuulikilathana esimano lyomadhewo.
Oominista osho wo iilyo yomutumba gwopashigwana oya li wo ya kutha ombinga momadhewo moka.
“Nonando kakwa li oshipu, otwa kambadhala sigo mpoka twa hulile, ashike osha li tashi nyanyudha,” Steenkamp a shanga ngaaka.
Steenkamp okwa ti kutya omadhewo oshinina sha simana monkalamwenyo yomuntu kehe oshoka ohaku xwaxwameke uundjolowele womuntu.
Aanyasha oyendji mongashiingeyi oya itula mo momadhewo okukwatela po uundjolowele wawo.
