Omupresidente Netumbo Nandi-Ndaitwah okwa kumaida eeminista osho yo ovapeduminista opo va kale tava ulike oshihopaenenwa shiwa moshiwana nokulonga nondjungu.

“Yakuleni nawa oshiwana. Eembelewa oda nuninwa okuyandjaneka omayakulo moshiwana,” ta ti. Edi Omupresidente okwe di popya onghela pefimbo kwa li ta patula pambelewa okabinete kaye. Okabinete opo ka tameke oilonga neudo konima eshi kwa li eeminista da ya mokafudo. Omupresidente natango ota ka patulula omutumba keumbo lopashiwana mongula. Oilyo yEumbo lOmutumba wOpashiwana nayo okwa li ya ya omakafudo muDesemba.

Omupresidente okwa popya ta ti neudo okwa hala okumona eeminista mwa kwatelwa ovanailonga vepangelo veendodo da yooloka tava longo nelitulemo.

Nandi-Ndaitwah okwa kumaida eeminista opo di longe pauyuuki pehe na oulingilingi tau longifwa.

“Omwa pewa oshinakuwanifa mwe shi linekelelwa. Lalakaneni okulonga paushili pehe na okukengelela oshiwana,” ta ti.

Okwa ti eeminista nadi kale tadi pwilikine komaupyakadi a taalelwa koshiwana.

Omupresidente okwa ti neudo epangelo ola tamake okuyandja ehongo loshali koiputudilo yopombada.

“Ovanafikola ova tameka nale okulishangifa koiputudilo ya yooloka,” ta ti.

Okwa yelifa ta ti fiyo opapa oinima aishe otai ende nawa pefimbo ovalihongi tave lishangifa. “Naashi otashi ulike kutya epangelo otali longo nondjungu okuyandjaneka omayakulo koshiwana,” ta ti.

Omupresidente okwa ti elongelokumwe, ombili noukumwe nali twikile shaashi eshi otashi kwafele okuyambula po Namibia,” ta ti.

-fhamalwa@nepc.com.na