Auleria Wakudumo 

Odoolopa yaHelao Nafidi oya teelela exumokomesho lipe loshipangelo shopaumwene tashi ufanwa Helao Nafidi Private Hospital. 

Oshipangelo eshi osha teelelwa shi ka yambule po onghalo youhaku modoolopa. Oshipangelo osha teelelwa shi ka hovelwe okutungwa muJuni ile muJuli 2026. 

Ngoloneya woshitukulwa shaHangwena Kadiva Hamutumwa okwa talela po elelo lodoolopa yaHelao Nafidi mEtitatu opo va kundafane kombinga yexumokomesho eli tali ya moshitukulwa shaye. 

Hamutumwa okwa tambula ko etungo loshipangelo shopaumwene moHelao Nafidi. Okwa ti osha fimana opo omahangano opaumwene a yambule po oshikondo shouhaku unene moshitukulwa shaHangwena. 

Oshipangelo shopaumwene shaHelao Nafidi otashi ka kala vati pamufika nokutungwa ngaashi oshipangelo shopaumwene Ongwediva Medi-Park. 

Otashi ka kala shi na ouhaku wopombada osho yo oikwapangifo yoshinanena. 

Mayola wodoolopa yaHelao Nafidi Darius Shaalukeni okwa holola kutya oshipangelo otashi eta exumokomesho modoolopa. 

Shaalukeni okwa ti ongoshinakuwanifwa shelelo lodoolopa okukwashilipaleka kutya ova eta exumokomesho, elelo ola yandja nale edu opo tape uya okutungilwa oshipangelo. 

“Oshipangelo otashi ka tungwa kOmafo, konima yomaulikilo oipindi a Helao Nafidi,” Darius ta holola. 

Mayola okwa holola yo kutya oshipangelo eshi otashi ka kala oshipangelo shotete shopaumwene modoolopa yavo. Okwa ti ove na mo ashike eendokotola dopaumwene ashike kave na mo oshipangelo sho vene moHelao Nafidi. 

“Oshipangelo otashi ka kwafela yo oshipangelo shepangelo Engela District. Oshipangelo shaNgela osho ashike oshipangelo shi li melelo lodoolopa naluhapu ohashi kala shi hadi neenghono,” Mayola ta ti. 

Okwa weda po ta ti kakele kokukwafela oshipangelo shaNgela, oshipangelo shipe otashi ka kwafa yo okuyambula po eenghalo dovakalimo vomoHelao Nafidi. 

Darius okwa ti eshi otashi ka ningwa okupitila mokukuta ovanhu vopomudingonoko. Ovanhu vopomudingonoko otava ka mona omhito imwe okumona oilonga ngaashi okuwapaleka, ovashingi, okulonga mokombifa, noilonga ikwao oyo ihai pula naana owino washa. Ovo veli modoolopa vena owino washa navo otava dulu okumona oilonga. 

Darius okwa fatulula kutya oshiwana otashi ka kondwa omaulu okuya kEngela. Okwa ti oshipangelo shaNgela eshi shatungwa, oshali ashike sha nhuninwa omwaalu vovanaudu munini. Mopaife, oshipangelo omwaalu owa ya pombada neenghono osho hashi eta shi kale shi hadi efimbo alishe nomikweyo dile dile. 

Oshipangelo shaNgela ohashi tambula ko yo ovanaudu okudja poushiindalongo Angola. Hano eshi shipe, otashi ka kwafela okukufa ko omwaalu umwe wovakwashiwana kEngela. 

-awakudumo@nepc.com.na