Sho omutse gwoshilongo Netumbo Nandi-Ndaitwah a patulula Omutumba gwOpashigwana mEtiyali, okwa thindi omuthindo kutya iilyo yomutumba gwopashigwana nayi nkondopaleke iilonga yawo okweeta ehumokomeho nokulongela oshigwana omauwanawa. 

Omutumba gwopashigwana ogwa patululwa pambelewa Etiyali, omanga okabinete ka patululwa Omaandaha. 

“Oshigwana osha tala kune ongaaleli osho wo aayetipo yooveta, noya tegelela oshindji tashi zi mune okuhumitha komeho oshilongo shika osho wo okweeta omalunduluko okuhwepopaleka onkalo,” ta kumagidha ngaaka. 

Omutse gwoshilongo Nandi-Ndaitwah, okwa dhimbulikitha wo iilyo yomutumba gwopashigwana kombinga yoompango noma l andul athano gomutumba gopashigwana, nkene ye na okutalulula nokunkondopaleka oompango dhi li muuwanawa woshigwana osho wo woshilongo. 

Ta ti, naya tule miilonga eyetepo lyiilonga, aanyasha naya kuthe oombinga mooproyeka dhokuhwahwameka nokukokeka eliko moshilongo, omauwanawa goonzo dhuushitwe, uunamapya, okunduluka na kehe tashi humitha komeho oshilongo. 

“Shika otamu ke shi pondola ashike ngele tamu longo neitulemo, uuyuki  osho wo nuudhiginini. Ikalekeni kokule nuulingilingi, ee tamu longele kumwe opo mu pondole shoka shi li mondjila oshoka elalakano lyimwe ashike,” ta kumagidha ngaaka. 

Nandi-Ndaitwah okwa ti, okuna ashike omimvo ne ko2030, hoka Namibia uuvaneke omauwanawa ogendji, opo Namibia a kale pomuthika gwiilongo ya putuka. 

“Ethimbo olya pwa po, onkene ethimbo lyokulonga opo tu gwanithe po shoka tu uvaneka opaife, ombunda nayi ye moshihwa tu vule okusindina,” ta kumagidha ngaaka. 

Omupresidente omanga inaaya koshipundi, okwa li a uvaneke okulonga nuudhiginini, nuuyuuki osho wo neyitulemo, oshoka elalakano lye okuhumitha komeho Namibia. Sigo oompaka oshigwana otashi ulike ohokwe niilonga ye. 

-vkaapanda@nepc.com.na