Auleria Wakudumo
ONAMBANGO – Omupangulindjai Martha Imalwa okwa indila ovanailonga voshikondo shouyuuki unene ovaeti voihokolola opo va djale onyati moilonga yavo nokuhambadapalekwa ngeenge tava ningi omatokolo.
Edi Imalwa okwe di holola pefimbo a ka popifa keumbo lanakufya, omweeti woihokolola momhangu yaNdangwa Justine Shiweda komukunda Onambango moshitukulwa shaShikoto.
Omanga ta yandje omahekeleko aye kovakwapata vaShiweda, Imalwa okwa indila opolifi opamwe ovanailonga voshikondo shouyuuki opo va kwashilipaleke kutya ova tula keshe ovo vena moo nyala mefyo laShiweda.
“Efyo laShiweda inali tu teya omukumo. Ngeenge otave tu mane po, nave tu mane po,” Imalwa ta holola nondaka i hadi oluhodi.
Imalwa okwa holola yo kutya ngeenge ovaeti voihokolola itava djala onyati nokuninga omatokolo a kola, nena otashi dulika oshilongo shi kwatwe ko kookalyamupombo.
Ngoloneya woshitukulwa shaShana Hofni Iipinge okwa holola kutya oshinima sha ningilwa Shiweda oshinima tashi kumwifa notashi difa omaxwilili.
“Oshinima eshi inashi kuma ashike ovakwanedimo vaShiweda ndele osha kuma Namibia alishe. Shiweda okwa li ta kaleke po ouyuuki moshilongo,” Iipinge ta holola ngaho.
Iipinge okwa holola onghalo oyo ya li nakufya kutya oyali ya fa oheli. Okwa ti nakufya okwa ehamekwa okudja poshiningwanima fiyo omefyo laye.
Ngoloneya okwa holola yo kutya Omupresidente Netumbo Nandi-Ndaitwah okwa li a holoka koshipangelo okutalela po Shiweda.
Ngoloneya okwa indila oshiwana opo shi tule po okulonga oimbuluma.
Efyo laShiweda inali vela ashike ovapambele vaye ndele ola kuma Namibia alishe.
Ovanapolitika, oohandimwe neengudu dopamilamheno oda holola eudo nai lavo molwa efyo laShiweda. Ongudu yoLandless Peoples Movement (LPM) oya holola kutya ovatamanekwa naaveshe ovo tava feekelwa meponokelo nedipao laShiweda nava pewe ehandukilo la shiyako.
“Eshi osha pumbwa okuningwa opo ku tumwe etumwalaka keembudi kutya itava dulu okukala tava ningile oshikondo shouyuuki omatilifo,” omupopiliko wo-LPM Lifalaza Simataa ta holola.
Simataa okwa indila yo epangelo oshoyo opolifi opo i nane ko keemwiya davo nokutula eameno lovanhu komesho.
“Osha fimana okukwashilipaleka kutya ovo tava longo nouyuuki ova amenwa. Itatu dulu okukala tuna ounona vashona tava kanifa eemwenyo davo molwa eengangala,” Simataa ta holola vali ngaho.
Omanga ongudu yoAffirmative Repositioning (AR) moshitukulwa shaShana ya holola Shiweda onga omunadjungu, ena eitavelo.
Ovakwanedimo vaShiweda ova holola kutya ovali vena elineekelo kutya ota kondjo shaashi okwa li afa eli monghalo ili xwepo.
Ovakwanedimo vaye ova shiivifila Kundana kutya Shiweda okweva shiivifila momafiku 30 Kotoba 2025 opo va fiile oludalo oshisho shaashi okuli ko natango efimbo lile.