Neudo okwa lopotwa ovanambelewa vopolifi 13 va kwatwa po eshi va longa oimbuluma ya yooloka omanga vahetatu ove li modolongo natango.
Ovapolifi aveshe ovalumenhu.
Edi oda popiwa kukakukutu kopolifi Inspector General Joseph Shikongo Etivali pefimbo kwa li ta yandje ouyelele kombinga yoshikonga shokukelela oimbuluma moWindihoek.
Oshikonga shokukelela oimbuluma osho osha tameka neudo momafiku 30 Januali fiyo 02 Febuluali koitukulwa aishe 14.
Oshikonga osha lukwa edina Walya Shakakodi tala pombada sha hala kutya kwaalo opolifi oko tai di oko okukwata po ookalyamupombo va longa oimbuluma.
Shikongo okwa yelifa ta ti ovapolifi vatatu ova kwatwa po eshi va hangika noingangamwifi nove li natango modolongo.
Oshibofa shavo osha undulilwa komafiku komafiku 27 Apiilili 2026.
Okwa hokolola ta ti omupolifi umwe natango oku na oshibofa shekwatafano shonghendabala yedipawo osho yo oshibofa shekwatepombabyona.
Ota holoka momhangu momafiku 4 Juni 2026.
Shikongo okwa ti ovapolifi vatatu ova kwatwa po mekwatafano loshibofa shokulonga oulingilingi.
Ovapolifi vavali natango ove li modolongo omanga umwe okwa mangululwa konima eshi a pewa obooloha.
Okwa weda po ta ti ovapolifi vatatu ova kwatwa po eshi navo taku fekelwa va longifa oulingilingi.
Ove li modolongo natango nomakonakono otaa twikile.
Kakukutu kopolifi okwa twikile ta ti ovapolifi vatatu ova kwatwa po mekwatafano loshibofa shevako loimuna.
Ova dja mo modolongo konima eshi va pewa omhito yokulifutila mo.
Omunyasha a hangika e li komadeulo opolifi okwa kwatwa po eshi a ninga omaindilo oilonga yopolifi nodjapo yoipupulu.
Okwa dja mo modolongo eshi a pewa obooloha.
Shikongo okwa ti onghalo yovanambelewa vopolifi tava longo oimbuluma otai ulike efano lii kombelewa yaye osho yo moshiwana.
“Otashi fifa ohoni ngeenge ovapolifi tava longo oimbuluma. Ovapolifi nave lihumbate nawa efimbo keshe,” ta ti.
Okwa ti osha fimana ngeenge ovapolifi tava ulike oshihopaenenwa shiwa komesho ovanhu.
Shikongo okwa ti nonande ovapolifi va taalela omashongo a yooloka inava pumbwa okuteka omukumo wokulonga noudiinini ile okulihumbata nawa.
Okwa kumaida ovapolifi opo va twikile okulongela kumwe noshiwana okukelela oimbuluma.