Abraham Mwanyekange 

Ongwediva – Thomas Haihonya, omulumenhu weedula 45 okwa dika olukalwa laye koshi yomwoonde popepi nendoloma loimbodi modoolopa yOngwediva. Haihonya okwa li omutungi, ashike iha tungu vali molwaashi okwa li hakukilwa koudu wombada ou we mu etela oulema. Haihonya komukunda okwa dile kEfidi moshitopolwa Omusati. 

Haihonya ta ti nonande ta endele kemhango, oha piti ongula a uka pendoloma loimbodi a ka konge mo oundooha nelalakano opo e va tunhe ye e va twale konhele yokuhanauna po oikwatenda neendooha nelalakano a mone ko oshimaliwa. “Molwaoikwa noipangifo ihe po, fiyo onena konima yeemwedi nhatu natango inandi twala ko sha,” ta ti ngaho. Okwa hokolola kutya okwa li e na oilongifo yaye mwene, ashike kaume kaye okwa landifa po oilongifo yaye aishe. 

“Okwa ula nge kutya ondi li pokufya nonghee oilongifo kai na vali oshilonga kwaame,” ta hokolola. Haihonya ta weda ko ta ti ngeno kapa li Ovasamaria ovanamitimanghenda ava have mu pe oikulya efiku nefiku ngeno Nakaidi kaHalwenya okwa lila ko nale. Eshi a pulwa ngeenge okwe lilongekida okudjapo ponhele opo, Haihonya okwa ti ponhele okwa hokwa po shaashi ope na omhepo yombili, kakele ngeenge okwa mono ekwafelo a pewe oufemba ye ta shangwa opendjela molwaasho kutya ye oshilema, opo ashike ta dulu okudja po. 

“Ondahala onhele yange opo andi dulu okukala noludalo lange olo nda efa nale oku limona momesho.” Haihonya okwa ti okwa li a talelwa po kouministili woufikepamwe ndele nande ongaho inave mu lombwela sha shomupondo. Kundana okwa li a pula ouministeli u tye ko sha konghalo yaHaihonya okupitila mombelewa yomupopiliko, oyo ya ti opo tai ka konga ouyelele wa wana nawa. –abbenghilai@gmail.com