Ofikola yedina Onanghulo oyo ya li ya lilila oshiwana shi na sha nemanifo letungo lavo lomuhandjo wofikola, wokukwafa ovanafikola pefimbo lefundja osho ya dimbulukiwa koshiwana. 

Omukulunhufikola Sedekia Udjombala okwa ti konima ashike yekemo lavo, ova mona omunangeshefa umwe e va pa N$15 000, osho yo oshikondo shehongo tashi ti otashi kwata keembete osho yo eembiya dokutelekela neehaasa. Eengeshefa ngaashi Ondangwa Town Lodge osho yo ovanangeshefa vamwe navo ova udaneka okuyambidida. “Ngaashi nokuli oimaliwa ei twa pewa yoN$15 000, otwe i landa nale omapoto oundjuwo, osho yo ominino adishe da pumbiwa opo oundjuwo va pwe okulongwa,” ta ti. 

Ovadali ve na ounona hava fikola pOnanghulo ova li va ongela oshimaliwa sha fika poN$600 000, oyo ya kwafa okufikameka po omaboloka avali omihandjo, omo keshe limwe tali ka idilila ovanafikola ve li 80. 

Udjombala okwa twikila kutya ofikola yavo oyo imwe ei hai monifwa oixuna kefundja molwaashi, ohai dulu okupata oule weemwedi nhatu ngeenge efundja le ya shaashi ounona kav ena apa tava piti. 

“Onghalo oyo nee ye tu fininika, opo tu ongele oshimaliwa tu ete po omatungo,omo hatu dulu okwiidilila ovanafikola, unene ava hava shange omakonaalono akula,” ta ti. 

Undjombala okwa yelifa kutya meedula da ka pita natango ova dula yoo oku ongela oimaliwa oyo ya tunga okombifa yokutelekela, osho yo osaala yakula yo ku ongalela ovanhu, oshoyo oihongi. 

Undjombala okwa yandja olupandu laye linene kwaaveshe ava va yambidida fiyo opapa, nota pula ava tava twikile nokukwafa ve shininge. -taimihaihambo2000@gmail.com