Abraham Mwanyekange 

Ovakalimo ve li omi- 25 womElyambala mOngwediva ova pewa omukanda okudja komhangu yopombada yaShakati. 

Ombapila oye valombwela opo va kale vafiyepo eumbo molwaasho vati kali fi lavo nefiku laxuuninwa onena nongeenge inave shi ninga otave ya va kufwe mo keenghono. 

Ester Martin (66), okwa lombwela Kundana ta ti ponhele opo opo a dalelwa nokwa ninga po paife eedula omi-66 no ke na vali apa ta dulu okuya pamwe novatekulu osho yo oludalo. Efimbo a popya nomutoolinghundana okwa ti onhele oyo yoErf 5407 okwa li yaina nota ti eshi ina a fya ko oya ya kedina lokamonakadona, ta ti ke na eshiivo kutya oya ya ko ngahelipi. 

Okwa ti ohaluka ashike mo 2024 eshi va lombwelwa kutya onhele oya landwa po, kutya okulye okwa ti kena eshivo, ta ti konima okwa ka uda ouyelele kutya oya landifwa po koshitenya shaye shOshizimbwbwe eshi sha hombola okamonakadona kedina Jordan. 

Jordan Tuyenikumwe Mutatabikwa okwa lombwela Kundana ta ti manga inakulu ou a dala ina ina fya, onhele oya li nale ya tulwa kedina laye. 

“Oudjuu owa ka dja ashike apa eshi nda hombolwa, otwa hombola omaliko e li mumwe, sha yela kutya aishe yange noyaye oya ya mumwe,” ta ti. 

Mutatabikwa okwa weda ko ta ti omushamane waye oye a landifa po onhele meholamo. “Omushamane wange okwa kengelela nge, ina lombwela nge sha, kandi shi kutya onhele okwe i landifa kulye, nokwiingapi. Inandi mona oshimaliwa nokomatuvikilo ange ombaanga inashi ya ko, oh paife okwa etela nge oupyakadi,” ta ti. Mutatabikwa okwati pauyelele ou amonapo otau ti nakulanda po onhele oku li omushiinda shavo e na odalate ya kwatafana nayambulavo. 

Okwa ulika eudo laye lonai molwamushiinda ta lande onhele ndele ina popya naye fiyo okonena. 

“Mo2024 eshi nda uda kutya eumbo ola landifwapo okwali ndakufa onghatu opo tu ye kohahende tu mone kutya eumbo lashuna kedina lange, kakele otwa ka hulila mounyengwi,” ta yelifa. 

Kombinga ngeenge vo nomushamane ohava kwatafana, Mutatabikwa okwa ti okwa kala efimbo nokukondjifa omushamane waye opo va udafane nanakulanda onhele opo ngeno va twe kumwe. 

Okwa ti okwa pula omuholike waye opo a landife po nande onhele yaye imwe ye a fute oimaliwa yovanhu. 

“Keshe efimbo handi popi nomushamane wange oha ti ashike aishe otai kala nawa inandi limbililwa, lwahuuninwa nda popya naye mongodi oshivike sha dja ko okwa udaneka kutya ote ke ya kOngwediva opo a kandule po omukundu ou,” ta ti. 

Onghendabala yokumona omushamane waMutatabikwa oya hulila mounyengwi. 

Vamwe Ovasamalia ovanamutimanghenda ove limanga oukuni kumwe tava ongele oshimaliwa shokufuta hahende nonghendabala yokuya moshipala etaatao laMartin novaneumbo laye monhele. 

-abbenghilai@gmail.com