Omukuluntu gwopolisi moshitopolwa shaShikoto Ndeshipanda Iifo okwa ti, oya tegelela iizemo okuza kaanambelewa yuuhaku kutya oshike sha eta uuwehame waanandholongo taku tengenekwa ye li 200. 

Okwa li kwa lopotwa aanandholongo mondjedhililo Omuthiya ya li ya falwa ya ka mone uuhaku koshipangelo oshinene shaNandjokwe sho taku fekelwa ya lya ohefa okupitila miikulya ya pewa mekulo lyondholongo. 

Aanandholongo anuwa oya kwatwa koshimela yo taya kungu omanga yamwe kaaye na oonkondo. “Katu na natango uuyelele wothaathaa kutya oshike sha eta aanandholongo ya ehame ngaaka ashike otwa tegelela aapangi ye tu pe shoka ya mono konima yeyakulo,” ta popi ngaaka. 

Iifo okwa ti aanandholongo ye li 134 oya mono uuhaku. Nonando kwa li kwa kala yahamano taya konakonwa, ayehe mboka ya mono uuhaku oya shuna mondjedhililo, po kape na nando ogumwe a kwatelwa moombete. 

Sha ikolelela kugumwe e na uuyelele na ina hala edhina lye lyi tumbulwe, okwa ti aanandholongo yamwe kakwa li ya falwa koshipangelo. “Yamwe ashike ya mono uuhaku, yamwe oya li ya thigwa po, nomatompelo gaa shiwike,” ta ti ngaaka. 

Otaku hokololwa kutya aanandholongo mboka okwa li ya tameke okweehama sho ya pewa onyama yondjuhwa okuza mekulo. 

Aanandholongo anuwa otaya popi kutya oya tameke ashike okweehama konima ya lya ondjuhwa ndjoka, omanga mboka inaaye yi lya inaya ehama, onkene otaya fekele ohefa miikulya, nenge ondjuhwa ya ninga nayi. 

-vkaapanda@nepc.com.na