Auleria Wakudumo
ONDANGWA – Elelo lodoolopa yaNdangwa ola ongela oshimaliwa shi fike N$885 070 kouvalelo wowina wa li ko Olomakaya ponhele yomaulikilo oipindi yaNdangwa.
Ouvalelo owa ningwa nelalakano lokuongela oshimaliwa shokulongifa momaulikilo oipindi aNdangwa (OTIE), oo a tengenekwa a ka kale ko okudja mo24 Apilili fiyo 02 Mai neudo mOndangwa.
Mopaife ngaha oshi li oshikando oshi-13 elelo lodoolopa yaNdangwa tali ningi omaulikilo oipindi. Ovanangeshefa, ovaleli veengudu dopapolitika novaleli vopamufyuululwakalo okwa li va holoka momwaalu munene okuyambidida Ondangwa. Rani group oyo ya yandja oshimaliwa shi li pombada shoN$70 000. Taku shikula First National Bank (FNB) noshimaliwa shi fike poN$65 000.
ALV Construction Engineering oya yandja oshimaliwa shi fike poN$51 000, omanga Kambwa Trading a yandja oN$50 000. Oshipangelo shopaumwene shaNdangwa osho yo Shivute Building Supplies keshe umwe a yandja N$35 000.
Omupedupresidente Lucia Witbooi okwa li a holoka mOndangwa. Witbooi oye a pitila mondabo noshimaliwa shi fike N$5 000.
Omupedupresidente okwa tumikidwa yo kOmupresidente Netumbo Nandi-Ndaitwah opo a yandje ekwafo laye loshimaliwa shi fike N$10 000 osho yo minista weyambulepo ledoolopa nomikunda James Sankwasa N$2 000. Witbooi okwa ti omaulikilo oipindi aNdangwa okwa lunduluka moule weedula 13 nokwa ninga onhele yokuyambula po eengeshefa, okukwatakanifa oipindi pokati keengeshefa dinini naado dopokati.
“Omaulikilo oipindi oo taa shingi nokuyambula po eliko loshilongo nexumokomesho leliko loitukulwa,” Omupedupresidente ta holola ngaho.
Witbooi okwa weda po ta ti omaulikilo oipindi ohaa yandje omhito iwa kovanangeshefa opo va landife nokuninga omakwatafano novanangeshefa vakwao meni nokondje yoshilongo.
Okwa ti Ondangwa oi na omauwa mahapu oo taa kwafele okuyambula po oipindi ngaashi opate yeshina lokolutenda, okapale keedila naikwao imwe oyo hai nane ovanangeshefa. Omupedupresidente okwa ti omaulikilo opaupindi otaa twaafana kumwe noNational Development Plan itihamano osho yo oVision 2030.
Nande ongaho, ovanangeshefa ova holola eudonai lavo eshi vati epangelo hali yandje eetendela dimwe komahangano okondje yoshilongo omanga moshilongo mu na omahangano oo taa dulu okulonga oilonga ya faafana. Omunangeshefa Josua Haimbodi okwa indila omupedupresidente opo a fikife etumwalaka keembonge dakula opo oshinima sha tya ngaha shi mone exulilo.
“Ngeenge ope na ou a dja nande okehangano lasha lokondje yoshilongo eli omu, na fikame. Eshi otashi holola kutya ekwafo nali yandjwe kovanangeshefa vetu ovo veya okukwafa odoolopa nomefiku eli lonena,” Haimbodi ta indile ngaho.
Okwa ti ngaashi ehangano laye ledina Emirates Construction ola xula okuteendela eeproyeka dishona opo a yandje omhito kwaavo opo tave ya mowela.
-awakudumo@nepc.com.na