ONDANGWA – Omulumentu gwomimvo 33 Thomas Sheya ngoka ta tamanekelwa edhipago lyaanona ye yaali, gumwe gomimvo mbali nagumwe gomimvo ne omumvo gwa zi ko muSepetemba sho anuwa e ya pondo nokusa, okwa tindilwa ombooloha. 

Omupanguli Nelao yaFrans okwa undilile oshipotha komasiku gane Aguste nuumvo. 

Oshiningwanima osha ningilwa momukunda Onkani moshitopolwa shaShikoto. Aakwanezimo oya li ya ningi omunyanyo taya pula Thomas kaa pewe eyifutilemo, oshoka anuwa okwa dhipaga oonzigona dhaa na ondjo yasha. 

Sheya anuwa okwa li a kutha uunona we koWindhoek e te ke wu dhipagela komukunda Onkani moshitopolwa shaShikoto. 

Sheya okwa tindilwa eyifutilemo, omolwuunene woshipotha osho wo omakonakono gopolosi ngoka ge li metifa, nompangu oyi na uumbanda kutya ngele okwa mangululwa otashi vulika a ye omakonakono gopolosi moshipala, sho kasha li natango muuwanawa woshigwana a pewe ompito yokwiifutila mo. 

Omulumentu gumwe gwopomudhingoloko mpoka okwa hokolola kutya okwa li a tuminwa etumwalaka kutya na ka tale ko omidhimba dhaanona komandoloma gomeya manga inaadhi lika po koombwa, ye ota ka imangeleka. 

“Onda li nde mu lombwele kutya ina ninga shoka ta dhiladhila, po opo nee mpoka a zi po i ifale kopolisi kOkatope,” ta popi ngaaka. 

Ta ti anuwa okwa kala ta hokolola kutya oku uvite nayi tu ulwa kusuwala ye omumwayina gwayina yaanona kutya haye he yaanona, ye te mu tuku iitya iinene. 

Omulumentu ngoka okwa ti okwa kala te mu kumagidha kutya ayihe na ekele kombunda, ihe nani ita pulakene. 

“Ongulohi yuusiku mboka sho a zi poondingosho okwa zi po ta lili, u uka kegumbo hoka a ka longa iilonga yi li ngaaka,” ta hokolola ngaaka. 

vkaapanda@nepc.com.na