Auleria Wakudumo

Omuprima woshilongo Elijah Ngurare okwa holola kutya omalelo opamufyuululwakalo oo omesho nomatwi epangelo okuhanganifa oshiwana. Ngurare edi okwe di holola pefimbo ta talele po Omukwaniilwa wUukwaluudhi Josia Shikongo Taapopi. Omuprima okwa talela po omukwaniilwa mOmbala yaye mUukwaluudhi. 

“Omalelo opamufyuululwakalo ohaa longo oshilonga sha fimana okuongela oshiwana nokukwafela epangelo,” Omuprima ta holola ngaho. Ngurare okwa holola kutya oilonga yavo nai pewe olupandu alushe shaashi ohai kwafele okuyambula po eliko loshilongo moitukulwa aishe. 

Ngoloneya woshitukulwa shaMusati Immanuel Shikongo opamwe nookansela voikandjohoololo ya yooloka novanangeshefa ova li va holoka okutambula ko omuprima. 

Shikongo okwa indila epangelo opo li endelele po okutunga opate yaTsandi-Onesi-Epalela. Okwa ti nonande ovatungi va hovela nale oilonga, otava ende kashona neenghono. 

Opate ei otai ka kwafela okukwatakanifa olweendo loshiwana pokati kaTsandi fiyo Epalela. 

Onda indila yo omuprima opo epangelo li tule moilonga okutunga okanala mUuvudhiya. 

“Okanala aka opo ke li nale ashike inaka tungwa. Ondi udite kutya ngeenge oka tulwa okaungulita ndele taka tungwa nawa nena otashi kwafele shi dulife eshi omeva taa kunguluka ashike medu,” Ngoloneya ta holola ngaho. 

Omukwaniilwa Josia Shikongo Taapopi okwa tambula ko omuprima nosheendo shaye mombala yaye. 

Taapopi okwa indila epangelo opo li tule moilonga aishe oyo tava udanekele oshiwana. 

-awakudumo@nepc.com.na