Ovalumenhu vane ovo ve li omanyakwa otava hokolola tava ti ova pewa omaano okuimba eemhoko, nohava imbi keehango nelalakano lokumwenyeka oivilo. 

Omakanda hava imbi eemhoko ovo Mutilifa Talvi a shivika nawa Bwila, Setson Shipaxu, Kamati Lazarus osho yo Jonas Jacob a shivika nawa Mtondoz. 

Ova hokolola tava ti ngeenge owa hange tava imbi eemhoko mohango, omunhu keshe okuvo ashike a tala molwaashi ohava imbi nawa. 

Omukulunhuwiliki wongudu yavo yomhoko Bwila okwa hokolola ta ti ova tameka okuimba eemhoko omudo 2014 kohango oyo kwa li i li pomukunda wavo. Ovalumenhu ava ova dja komukunda Omalyata moshitukulwa shaHangwena. 

Bwila okwa hokolola ta ti okuimba omhoko oshipewa shomaano a dja kuKalunga. 

“Otwa pandula Kalunga eshi a tu pa omaano okuimba molwaashi paife ohatu longo oshimaliwa shetu tashi pitile mokuimba eemhoko,” ta ti. 

Okwa hokolola ta ti ohava dulu okuimba eemhoko keehango da koya po-50 modula, naashi otashi ulike kutya ovanhu ova panda oilonga yavo. 

“Ohatu lihange tu na omusholondodo weehango dihapu detu pumbwa tu ka imbe omhoko ashike eehango dimwe ohadi kala di li mefiku limwe,” ta ti. 

Bwila okwa weda po ta ti oshi li eshongo linene va taalela unene tuu ngeenge ve lihange ve na omusholondodo weehango dihapu di li mefiku limwe. 

“Omafimbo amwe oto hange ovafuko va hala tu ka imbe keehango davo ashike ova hanga nale pe na vakwao ve lishangifa tete. Paife omunhu oha kala a handuka ngeenge twe mu lombwela kutya otwa ufanwa nale kohango yonhumba,” ta ti. 

Okwa yelifa ta ti ohava ka imba omhoko keehango odo di na ovafuko ve lishangifa tete. 

“Ohatu longifa ouyuuki noshili shaashi osha fimana opo tu kaleke po oukumwe nekwatafano liwa pokati kovafuko,” ta ti. 

Okwa kumaida ovafuko ovo ve na ehalo lokuhombola opo ve lishangife pefimbo uuna ngeenge va pumbwa omhoko. 

Okwa fatulula ta ti omhoko oya fimana keehango molwaashi eshi otashi kaleke po efimano lomufyuululwakalo wOshiwambo. 

“Natango ohatu imbi koivilo yomalihafifo ya yooloka ngaashi omashasho, oitalapepata, osho yo omadalo,” ta ti. 

Kwa au a hala okuuda ouyelele welixwapo kombinga yovalumenhu hava imbi omhoko na kwatafane navo konomola yongodi yavo 0818157218. 

-fhamalwa@nepc.com.na