OSHILUNGA SHONKOSHI – Nkene oshilongo sha mangulukile aakalimo yomomudhingoloko Oshilunga shOnkoshi, kombuga, oya kala nokunwa omeya gomomithima, ashike nena oya mono opomba yomeya.
Aakaalimo oya hokolola kutya oya kala nokulongitha omeya ga nigila okuza momithima nuuna ya hala omeya ga yela ohaya ka landa komikunda dhopuushinda ngaashi kOnaando, hoka haya yi nuutemba woondoongi oshoka haayehe ye na iitukutuku.
Oya ti, onkalo oya kala ya nkundipala oshoka omeya ngoka oga nika oshiponga kuundjolowele wawo, unene tuu kaanona.
Mwene gwomukunda Oshilunga shOnkoshi, Ashipala Jesaya Kawali, okwa ti oya kala nuupyakadhi womeya uule wethimbo, noka ya li ye shi tsu ondjodhi ngele esiku limwe naya ka mone omeya omayelele.
“Otwa kala twi idhidhimikila uupyakadhi womeya nonando twa kala nokuninga omayindilo opo tu ze muupyakadhi mbuka, ashike nena owa kandulwa po,” ta pandula ngaaka.
Ta ti, aakalimo kakwa li ye na nkene, oya kala nokunwa osho wo okulongitha omeya gomomithima.
Kawali li okwa ti, ota pandula epangelo sho lye ya kutha muupika wokunwa omeya ga kaka, ta ti, sho lye ya ningile nashi ningilwe wo yakwawo ya taalela uupyakadhi womeya.
Rosalia Daniel okwa ti, omeya ngoka ga patululwa otaga ka hulitha po uukoloni ya kala muwo omimvo odhindjidhindji.
“Omeya omayelele kutse oga kala ga pumba, ngele twe ga mono ongele twe ga landa okuza komikunda dhilwe, ihe shoka ohashi ningwa pwa pita ethimbo, nuuna pe na iiyenditho,” ta hokolola ngaaka.
Daniel okwa ti, kasha li oshipu unene kaakulupe mboka ye li momagumbo naanona aashona oshoka itaya vulu oku ka tala omeya aluhe komithima.
Ngoloneya gwoshijtopolwa shaShana Hofni Iipinge okwa ti sho a yi koshipundi nuumvo, okwa li a lombwelwa omaupyakadhi ga taalela iikandjohogololo ayihe, onkene okwa li a totha mo mbyoka tayi thiminike opo yi kandulwe po mbala.
“Uupyakadhi wumwe owo mbuka, aantu itaya vulu okukala kaaye na omeya ga yela moshilongo sha manguluka, sho osho nda endelelelitha mboka ye na oku ga eta po, ye shi ninge mbala,” ta fatulula ngaaka.
Iipinge okwa ti, oshigwana osha manguluka okutha ominino dhomeya okufala sigo omomagumbo gawo.