!Âubasenhe ra 5 000 sîsengu, Namibiab !nâ oli-e omkhâis ǂnamipe hâ ai!gûs xa !nuri-oabahes !aromas ge !Hūb di ǁÛs Netumbo Nandi-Ndaitwahsa, Mike Sangsteri hîa a TotalEnergies di !Nakaǂnôa presidenta ǂoa ge wekheb di Donertaxtsēs ai !Hūb Oms tawa ge !khō!oa. Nandi-Ndaitwahs ge ǀhûhâsibas nē !gâise oli-i !hūb !nâ hâ i ǂnamipe hâ ai!gûs hîa !hūb sâuǁkhāsib mâsiba !gâi ǀkhāb ǁga a dawa ǁkhāba nî ǂanǂanse ra !noe.
Nē ǀō-aisa ǁgamǁaredi ge ǂhanu ǁaeb ai ge ǂherexa, Namibiab kaise ǀgūse oli-e ūhâ !hūb ase ǂanhes !oa garu xui-ao, !nāsases nēsa hoa !hūbaisise ǂâiǂgae tsî ǁguiri-aona ǁîn ǂaiǀkhunudi ai ūhâ amaga.
“Gangan ta ge ra sida aimâ-aob tsî ǁkhāti ǁnā da ge ǀhao!gao hâ i konferensisa ge !khōdana hâ ib di ǁkhauǂuis aits ge oe-am !khaisa. ǁNā ǂkhâ!nâs hîa du ra mās ge kaise sida !aroma a ǂhâbasa, !nāsa !gôab di Namibiaǁîn ga nē da ra ǂgâ!nâ !harosa a ǁnâu!āsa,” tis ge ge mî. !Nau-amsa daodi !gâb ais ge TotalEnegiesa, !hūb di ǁûsa ǀasa ai!gûs hîa Venus oli-i hōǂuis hîa mâǂoa hâse ra !gawaǀîhes ǂnamipe ǂhabase gere ǂanǂan. “Tita ge !Hūb di ǁûsa tarena da nēsis kōse Venus projeks ǀkha nē kurib di !Khanni !nâ da ge tsoatsoas khao!gâ sī!nâhâsa ra ǂanǂan ǂgao. Sada ǀuni ǀhaos hîa da ge !Khanni !nâ ūhâ is khao!gâ da ge texnise !harib ai ǂhâbasa omkhâis ai ǀgaisase gere sîsen,” tib ge ge mî. Sangsteri ai!â ge mîs ge, projeks nēsi texnise !harib ai ǂkhîǂkhîsa !harosa sī!nâ hâse a ū!oahe ǁkhāse. Sao rase da TotalEnergies tsî !kharaga !hūgu di kontraktern ǀkha ǀkhamasa sîsenǁareba nî tsoatsoasas !oa garu. Venusa omkhâis ge ǂgui!nâgu ǁgoaǂuide engineern !harib ai !khōǂgā hâ, xawes ge TotalEnergiesa a ǂhomisa nēsa īǁkhā kaisa. “Nēs ge kaise a ǁgoaǂuixa!nâ tsî supu tama hâ projeksa. ǁÎs ge 3 000 metergu !gamsiba hurib !naka tsî 320 kilometerga huri-amma xuts ga ūo. ǁNāpan ge ǂgui ǁgoaǂuin hîa hurib di !âse hâna hâ, tsî ǁnā-amaga texnise ǀkhāb ai supu tama hâ,” tib ge Sangstera ge mî. Ai!âb ge ǁîba a mîs ge, TotalEnergies ge ǀnai ǁîs di omkhâis ǀaweǁguigu tsîna Namibiab di ǂgaeǂgui-aona a ǁgui-ai!â tsî mā-amdi ǀguide !âu hâ !khaisa.