Dalene Kooper

!Nakaǂnôa ministers ǂurusib tsî ǀhûhâsi !oabadi dis, Suzan Ndjalekas ge ge mî, ǁîs hoa Namibiaǁîn di !gâise hâs ai ǂâisa nî ǂnûisa. “Tita ūbasen hâ !ereamxasib ge, hoa Namibiaǁîn !gâise nî ûis !khais ai ǂâisa nî ǂnûisa. Tita ge ûitsamaxūn ǀkha nî sîsense ǁgaumâihe tama hâ, xawe khoen ǀkha. 

Hoatsama da ǂâis !nâ nî ūhâ !khais ge ǂurusib tsî !gâise ûis hoa khoen !aroma a ǂhâǂhâsa !khaisa,” tis ge Ndjalekasa ai!âkam sîsenǁare-aona ge mîba. 

ǁÎsa !gâi!gâba ǁkhorebas ǁaxasib, ǁKharas ǀKharisi ǀAwemā!nans xa ge ǀaweǁguihe hâ ib, ǁîs di ǁgaumâihes !Hūb di ǁûs, Netumbo Nandi-Ndaitwahs xasa tsēdīs dib tawa. 

Ndjalekas ge ǁKharas ǀKharisi ǀAwemā!nans !nâ ǂgiǂgosi ǀawemā-aose !Namiǂnûs ǁhûi!nâǂharis !aroma ge !â i. “Sida ge !Hūb di ǁûs xa hû khoeda, !haosi ǂnûsa xu !nakaǂnôa ministerse ge ǁgaumâihe. Nēb ge !nae!khaixa!nâ ǁaeb hîa khoen tawa !oabade sī-ūs a ama !khaisa gere ǁgauba,” tis ge ge mî. 

ǁÎs ge kurisana gere ǂgan, in ǁkhān as kōse ǂhanub ǁguiǂamdi tsî ǀaweǁguiga dīǂui, !hū!nāsi !ereamxasigan ra māhe ǁaegu !nâ. “Sadu ge ǁkhaeǂgāsen tsî nî huida, ǁkharas ǀkharib ūhâ ǁgui-aide dīǀoaǀoasa. 

ǁKharas ǀkharib ge ǂgom!gâba ǂhanub ǀkha ǂnuwi ǁkhā, ǀkharib di ǁanǂgāsaben tawa ra sī-ūhe ǂhâbasa !oabaden khoena nî hō!âsa ǁawoǁawos a amaga,” tis ge !nakaǂnôa ministersa ge mî. Ndjalekas ǁKharas ǀkharisi beros sîsenaona !khōǀkhā tsî ǁîn ǁga ‘ǂkham tsî ǀoasase a sîsenūhe ǁkhā” ti ǁnaeǁgau tsî gere ǂgan ni, ǀguixasib ǀkha ǂhanub ǁguiǂamde dīǂuisa. 

Ai!âs ge ǁîsa ganganxasiba ra ǁgauǂuise mâtikōses mâxōǀkhāgusa sîsenna dīs !nâ a ǂhâbasa !khaisa ǁîna gere mîba. 

ǁKhātis ge Ndjalekasa ǁîs di ǂgaeǂguis !gûǂgarob ǁgas gere kō-oa soab ai gere ǂan!gâ, !gomsin hîa gere hân ge ǀhûhâsigu tsîn xa gere tanihesa. “Ti !gomma tsâs ge sadu dis tsîna ī i, tsîs sida di !gâi!gâna sī!nâsa, sadu dis tsîna nî īsa,” tis ge ǀawemā!nans tsî sîsenaona ge mîba.