RUNDUS – !Nāsa studentn hîa ǂkhawusa ǀhûhâsiga xu ra ǂoaxan !aromas ge ǀgapi ǁkhāǁkhāǂuisensa tātsē īǁkhā tide ǁhawo-i ase ǀgui ība ni. 

Xawes ge nēsa ǂhanub, ǂhanub xa a ǀhonkhoe-aihe ǂnûiǂgādi tsî aitsama mâbasen hâ ǂnûiǂgādi di ǀhûǁarebese ge hâ ǁguiǂgāsende xu, nētsē ǂgui Namibiab ǂkhamkhoen, ǂnaumâiǁanǁguigu tsî !garo!ādi dina nētsē ǁîn ǁhawodi xa ra ībahe. 

Nē ǁaeb ain ge 15 ǁkhāǁkhākhâihe ra ǂkhamkhoena, Ngato Institute of Science and Technologys (NIST) hîa Rundus !nâ mâs tawa, mâtin !kharaga sîsen!khaigu ai ra hâ ǂurusib tsî !norasasib ǂnamipe tsû-aina a ǁkhaeba ǁkhās di ǁkhāǁkhākhâidi ǀkha a ǁaxa Social Security !Nans (SSC) di marisihub xa ge īkaihese. 

Nē ǂkhamkhoen hîa Zambezib, Erongob, Kuneneb, Ohangwenab, Omusatib, Oshanab tsî Oshikotoba xu hân, tsî ǀguiǀguiben !hūb a ǂhabaseba xu a ūsan tsîn ge, ǂUrusib tsî !Norasasib di 4ǁî tsî 5ǁî !Harikha ǁkhāǁkhākhâidi !nâ hâ. Nē proxrammi ge ǀgam kurikha ra !khoe tsî marisise ǀoasase SSCs xa mâ!gâhe hâ.”ǂGaoǀkhādi nē proxrammi !nâ ǁhaos di di ge a !gāsa,” Maria Shitakus, senters di danas gere mîsa !oa. ǁKhoreba ūhâ ǂkhamkhoena xu ra ǂgaoǀkhāhes ge, ǁgauǁgaus ama ǂkhawusa khao!hūga xun ra ǂoaxas disa ǂganamsens ǀkha māǂgāsa. 

SSCs ge ǁkhāǁkhā!âgu ǀguiga mātareba tama hâ, xawe hâ!khais, ǂûs, ǁkhāǁkhākhâis !nâ a ǂhâbasa sara-anab tsî hāǀaro rasen ǁkhāǁkhāsens !nâ ǂhâba hâ xūn tsîn hoana. 

Katalina Simuma Kakuras, Wilbard Shimpandab tsî Safiena Gawases hân hîa nē proxrammi !nâ Rundus, Omusatib tsî Oshikotoba xu hân ge ǁîn di ganganxasiban gere mâ soab ai gere mî, proxrammi hoaragase !gâise a aiǂhomisa tsî di ǁkhāǁkhākhâide ama ûib !nâ a ǂhâbasa ǂans tsî ǁkhāsiga ra mā ni !khaisa. 

ǂHâsigu an tsînas SSCsa ǀoasase ra dīǀoaǀoaba hoan nēpa ra ǁkhāǁkhāsenna tsîn ǁîna ǀgaisase tsî !garise sîsens ǀkha nē !ēsa nî dīǀoaǀoa !khais a ǂhâbasa !khaisa. 

Otjozondjupab di Naomi Kambuezas ge mîs ge, ǁîs ge WhatzApp ǂhaweb ai nē proxrammi ǂganamsendi xa khomai, ǂganamsen, ǂgaoǀkhādi ai dīǀoaǀoa, ū!oahe tsî nēsi ǀoasase NIST senters tawa ǁnā proxrammi !nâ hâsa.