Ovakalimo vomoshikandjohoololo shaNgela moshitukulwa shaHangwena ove udite ombili yokomwenyo eshi paife va etelwa oshivelelwa sheeshi kefundja.
Natango, efundja ola etela ovanhu oyuuyemo yoshimaliwa eshi ovanhu tava landifa eeshi neenhangu.
Oshiwana paife otashi kwata eeshi meendobe omo mu na omeva taa di moAngola.
Kansela moshikandjohoololo shaNgela, Immanuel Haixuxwa okwa koleka ta ti eefundja ola fika moshikandjohoololo shaye.
Okwa ti omikunda dina omeva efundja ongaashi Ouhongo, Onghala, Onambango osho yo Ohaingu.
Okwa yelifa ta ti ka pena eumbo la lopotwa li li koshi yomeva ashike omeva okwa taalama meendobe.
Haixuxwa okwa weda po kutya ka pena ofikola ya lopotwa ya pata komeva moshikandjohoololo shaye.
“Ngeenge owe ya moshikandjohoololo shange ota hange mo ovanhu ve kwete eenete tava kwatwa eeshi neenangu,” ta ti.
Okwa yelifa omeva taa kunguluka e na eeshi neenangu naashi osha etela oshiwana ehafo.
Kansela okwa kumaida ovadali opo va kale alushe tava tonatele ounona vavo vaha danene momeva shaashi osha nyika oshiponga.
Selma Moses omukalimo womomukunda Ohaingu okwa hokolola ta ti efundja oli wa shaashi oha li va etele oshimaliwa noshivelelwa.
“Efundja loneudo oli na omeva taa ende ka shona. Otuna omukumo kutya omeva itaa tula omaumbo etu koshi yomeva,” ta ti.
Hangula Matias okwa ti paife oha dulu okulanda ekutu loufila loshimaliwa osho a mono ngeenge a landifa eeshi neenangu.
“Ohatu landifa eeshi kopendjala. Ovakulupe ovo unene ve hole okulanda oshivelelwa. Otwa pandula efundja shaashi paife ka tushi ondjala,” ta ti.