OSHIKUKU – Omunafaalama gwiikwamboga okwa ti ngaashi iikulya ya ninga ondilo neliko lyoshimaliwa tali shongola, ngoka kee na oshikunino shiikwamboga mongashiingeya okwa kala po koshindji.

Princess Shikongo gwomomukunda Ongali moshitopolwa shaMusati okwa ti oshikunino she ohashi kandula po omaupyakadhi ge ogendji, okuza kiikulya, oshimaliwa osho wo uuwehame.

Shikongo oku na oshikunino shu udha iikwamboga ya yooloka, iimeno osho wo omiti ndhoka ha landitha.

 “Oshikunino shandje ihashi pe ndje ashike iipalutha nenge oshimaliwa shokukandula po omaupyakadhi osho wo oompumbwe dhandje, ihe ohashi etitha wo ombili megumbo lyandje, nokupanga omikithi dha yooloka,’’ ta hokolola ngaaka. 

“Egumbo lyandje olya ziza nawa, okuza kuJanuali sigo oDesemba, nomwenyo gwandje ohagu kala gu udha ombili. Oshikunino shandje osha topolwa moombiga mbali, iikwamboga osho wo omiti niimeno” ta popi ngaaka.

Ta ti, uuna a yematithwa, ee ta egulula oshikunino she shoka, ee ta dhingoloka mo ongeyo ndjoka iha mono kutya ohayi ningine peni.

Ta gwedha po kutya oyendji kaye na ontseyo nelalakano lyiikunino, nonando oyendji ohaya lalakane okulanditha okumona oshimaliwa.

Ta ti, oshikunino ohashi dhana onkandangala onene moonkalamwenyo dhaantu.

“Oshikunino shandje shoka nda kuna omiti niimeno ya yooloka, ohandi shi ithana oshipangelo, oshoka uuna nda kwatwa kuuvu ngaashi omikolo neshikisha oshowo uuna ndu uvite ombunda tayi pi nenge olutu lwa loloka, omo handi kutha omiti dhandje moka,” ta hokolola ngaaka.

Shikongo okwa ti, oha fulikitha omafo ngoka ee ta nu, ano oha dhungu omiti dhe mwene.

Ta ti, koshipangelo ke shi ko we, oha ipanga ye mwene.

“Oshimaliwa shandje meke ohashi zi mo pamalupita, uuna tandi landa shoka itaashi vulu okuza moshikunino shandje,” ta popi ngaaka.

Okwa popi kutya moshikunino she shiikwamboga omu na oomboga adhihe dhopaali, oonyanga, omatama, uunona wamundesha, omakapa nosho tuu.

“Uuna ookasitoma dha tokola okulanda esiku ndyoka, mesiku ohandi vulu okulonga N$3 000, nuuna kaape na ookasitoma nawa ohandi zimbuka N$700-N$1000,” ta ti ngaaka.

Ta ti, ota pandula oshoka oshikunino she shoka osha kutu wo aantu yatatu mboka haye mu longele.

Shikongo okwa ti, nonando ta tanga uuwanawa woshikunino, oshi na woo natango uuwinayi.

‘’Ohandi longitha oshimaliwa oshindji okulanda omiti, okukeelela uupuka wu iteyele miikunino yandje, shoka hashi vulu okushunitha oshikunino monima noonkondo,” ta popi ngaaka.

Martha Hawala ngoka ha longo moshikunino shoka okwa ti omalutu gawo ogo to tala, opo wu itaale kutya okulya iikulya ya ziza oku na uundjolowele.

“Oshikunino shetu otashi tu longele uuwanawa okuza kiikulya osho wo okumona oshimaliwa shokugwanitha po oompumbwe dhilwe,” ta ti ngaaka.

vkaapanda@nepc.com.na