ONAMUTAI – Omupresidente Netumbo Nandi-Ndaitwah okwa ti osha fimana ngeenge ounona tava tumwa keefikola dOsoondaxa opo va longwe eetundimbiibeli.

Edi Omupresidente okwe di popya oshivike sha dja ko pefimbo kwa li ta popifa eongalo Onamutai Anglican moshitukulwa shaShana. Nandi-Ndaitwah okwa li a ka uda omambo kongeleka yaNamutai oyo i li pomukunda wavo opo tuu natango a putukila.

Okwa li edite etumba okuuda omambo pamwe navamwaina osho yo oshiwana sha dja momukunda Onamutai. Oomeme meongalo laNamutai okwa li tava imbi omaimbilo nokukuwilila ve udite etumba eshi Omupresidente e li mokati kavo. Nandi-Ndaitwah okwa lombwela ovadali opo va twikile okutuma ounona keefikola dOsoondaxa shaashi eshi otashi kwafele ounona va kale neudeko lombiibeli.

Okwa ti ngeenge okaana taka yi kofikola yOsoondaxa otashi kwafele ounona ve lihumbate nawa keumbo nokofikola osho yo okukelela vaha longe oimbuluma. “Ofikola yOsoondaxa otai eta oidjemo iwa kounona. Okaana ngeenge oke na eudeko lombibeli nena ota kala ke na etilokalunga,” ta ti. Okwe weda po ta ti etilokalunga otali kwafele okaana opo ka kale ke shi kutya oshinima shonhumba osha puka noihashi ningwa. Omupresidente okwa pula Ovanamibia opo va twikile okukala ve na ombili noukumwe. “Ombili noukumwe otashi eta opo tu yambule po oshilongo shetu. Oshilongo shi na oshiwana shi na oukumwe nombili oshilongo shiwa,” ta ti.  Okwa ti epangelo otali twikile okukala li na ekwatafano liwa nelongelokumwe neengeleka moshilongo. Okwa weda po ta ti eengeleka oda dana onghandangala yakula moshilongo okudja pefimbo loita. Natango, Omupresidente okwa ti okwa pandula oshiwana eshi kwa li sha hangana nawa kefiku ledimbuluko laCassinga olo la li koshitukulwa shaMusati.

Okwa yelifa ta ti efiku laCassinga nefiku lelondo ayeshe okwa fimana mondjokonona yoshilongo. Omufitaongalo wongeleka yaNamutai, Paulus Kanime okwa pandula eholekepo lOmupresidente okuuda omambo pamwe navo. –fhamalwa@nepc.com.na