Omusamane wotete woshilongo Epaphras Denga Ndaitwah okwa pula Ovanamibia aveshe koonono ve litule mo momayambidido a pumbiwa mounona voumati.
Ndaitwah edi okwe di popya kedimbuluko lefiku lokanona kokamati, olo hali kala ko mo 16 Mei, odula keshe.
Okwa ti ounona voumati ova pumbwa omayambidido okupewa ounongo osho yo efimano li na sha nehongo, okukwafa omadiladilo avo momikalo da yooloka osho yo
okukala hava kufa ombinga moinima ya yooloka notai tungu eenghalamwenyo davo.
Ouyelele wa dja meenhumwafo okudilila kouministeli wehongo owa yelifa kutya, okudja mo 2023 omwaalu wovalumenhu ve li 8 720 ova lopotwa va efa ofikola.
“Natango ngeenge owa tale koiningwanima ngaashi omakwatonghonga, omahepeko oomeme nounona, ootate tava fiye po nokulikala omaludalo avo, omahepeko opamilele, oshili aishe oko ashike ya shangelwa kovalenhu oko,” ta ti.
Natango okwa holola yo enyeme laye, shi na sha noshivilo shedjalo lomanguwo koshiputudilo shoNamibia University of Science and
Technology.
“Koshivilo oko, ovakainhu ovo va li natango tava dengele mehongo eli, shi dule ovalumenhu,” ta ti.
Okwa twikila kutya oinima iwa, noyoludi eli puvo otai ya po ashike ngeenge va shendje omalihumbato avo, nokukala ve na omikalo osho yo efimaneko moshiwana.
Ndaitwah okwa yelifa yo kutya ombelewa yaye oye lipyakidila nokweeta po eepologalama di na sha nokukwafa ovalumenhu moNamibia, va dule okuninga eshi shi li mondjila, vo va twikile okukala ve na eenghalamwenyo di li melandulafano.
“Epangelo inali mu dimbwa, ndele oli mu na ashike. Diinineni ofikola, tuleni outeku moilonga nye tamu kala mu na efimaneko,” ta ti.