OSHAKATI – Aalumentu yaali mboka ya monika ondjo kompangu  omolwa uulunga wiimuna, otaya pewa egeelo nena mompangu yaMangesrtata mOshakati.

Aalumentu mboka okwali yamangwa po noku patulilwa oshipotha  sho yali yaadhikilila nonyama yoongombe mbali dha yakwa.

Aanafalama yomomikunda dha yooloka moshitopolwa shaShana oya kala nokulila iimuna yawo tayi kana okuza kuulithilo osho wo miigunda. Mwene gwomukunda Olupumbu, Shipanga Ambunda esiku lyiihokolola okwa lombwele oshifokundaneki shika kutya aanafalama oyendji oya kala nokulila iimuna yawo tayi yakwa po ihe kapuna uuyelele kutya ohayi yi peni no hayi yakwa kule.

“Omupya gwawo, se ku se ota tu elago, okwa mangwa aalumentu mboka yaadhilila nonyama yoongombe dha yakwa. Ko kutya oyo ya kala taya tyakaleke momikunda dhetu, osho wo omikunda dho popepi,” ta nyenyeta ngaaka. Mwenegwomukunda ota fekele wo kutya mboka ya kwatwa po hayo ayeke, oyena okukala elyenge, ihe oshiwanawa ngele taya popi ya kwawo opo ya kuthwe mo moshigwana.

Omunafalama gumwe Thobias Simon okwa nyenyeta kutya iimuna oyina ondilo, oongombe odha tameka N$12 000, ndyoka ongele weyi mono kombiliha, ihe iimuna yawo otayi yakwa ashike kaantu yaashi nonando yongombe.

“Otwa hala aalandithi yonyama, ya kale taya ulike aluhe omitse dhoongombe dhoka yadhipaga osho wo uupapa, oshoka ota tu fekele mboka oyo haya tu mu aafuthi mboka yo ya lande onyama kombiliha,” Simon ta popi ngaaka. Tikitifa Indombo gwomomukunda Oshuulo okwa ti aanafalama oyendji oya kanitha iimuna yawo, omuntu gumwe ta yakwa oongombe ne nenge ntano, shoka otashi ti ngiini?

Ta ti, kashi shi ashike oongombe, ihe niikombo oondongi noonzi, oya taalela uupyakadhi. Opolisi moshitopolwa shaShana otayi kumagidha oshigwana shi hulithe po okulanda iimuna osho wo onyama ontalala momapandaanda kapu na oombapila.

Opolisi oya kumagidha ngaaka konima ya mono uulunga wiimuna wu uka pombanda moshitopolwa. Uulunga wiimuna itau holoka ashike moshitopolwa shaShana, ihe natango otau lilwa koshitopolwa shaMusati.

Omupopiliko gwopolisi moshitopolwa shaMusati Anna Kunga okwali a hokolola kutya  omukiintu gwomimvo dhopokati okwali a mangwa po sho a adhika nonyama ontalala ya yakwa, a li e yi lalakanena okapana a landithe. Kunga okwa ti aafuthi yiimuna unene ohaya ka landitha kaalandithi yuupana, ihe uuna ya adhika nonyama ya yakwa nayo otaya mangwa po oshoka oya londodhwa nale yaa lande oonyama nenge iimuna momapandaanda.

Ta gwedha po kutya kehe siku otaya lopotelwa uulunga wiimuna, omwaalu otagu indjipala kehe siku.

“Ota tu indile oshigwana shi kale tashi sile oshimpwiyu iimuna yawo, nayi kale miikaha yomuntu omwiinekelwa yo nayi kale tayi edhililwa. Mbyoka yi li mondoolopa nayi falwe kuushayi nenge kehala lya gamenwa,’’ ta kumagidha ngaaka.

Moshiningwanima shimwe, omulumentu gwomimvo 30 okwa mangwa po sho kwa li a yaka oshikombo noku shi dhipaga. 

Oshiningwanima shoka osha holoka momukunda Oshitutuma. Omulumentu ngoka anuwa okwa li i iyakele koshigunda shaantu e ta yaka ko oshikombo shoka shi na ongushu N$2 500. Aakalimo yomonooli oya taalela uupyakadhi wiimuna yawo tayi yakwa kiigunda osho wo momakuti.

Natango okwa dhidhilikwa aaniilonga mboka ya kutwa onga aasita yiimuna yeli wo melyenge limwe naafuthi.

Sem Shipanga ngoka e li omukalimo moshitopolwa shaMusati okwa ti, oyendji yomuyo oya kutu aangola ihe kaye ya shi nawa, naampoka ya za kaye shi po.

Ngele ye ya momindhingiloko dhawo e taya tseya mo nawa, ohaya ka yaka po iimuna yawo.

“Ota tu kanitha iimuna noonkondo, ngele oya pitithwa yu ukithwa moAngola ihatu yi mono we, ihe ondi wete kutya uupyakadhi oongamba ndhoka dha weya pokati kaAngola naNamibia,” ta ti ngaaka.

Shipanga ta ti, oongombe dhimwe dhoka hadhi kana ihe inadhi za mo moshilongo, ohadhi ka monika oshoka, ihe ngele dha piti mo ihadhi ka monika we, oshoka moshilongo odha hingwa mo. – vkaapanda@nepc.com.na