Abraham Mwanyekange

Mwene wehangano loHeicky Land Surveyor Iiyambo Heicky Tangi okwa pula ovanyasha opo va kufe ombinga momaudano. Ta ti omaudano ohaa lwifa oimbuluma moilongo.

Tangi odo okwe di popya Olomakaya pokapale komaudano kEmbadu mOshakati eshi ta yandje ekwashilipaleko komudani dingi woMighty Gunners Ladies Millicent Hikuam eshi a dana nawa moudano wavo noMighty Angels molixa yopombada yooomeme moshilongo.

“Ondjodi yange oipu. Onda hala okuhumifa komesho omaudano okatanga kokeemhadi moNamibia, okuyandja eemhito kovanyasha vetu va pondole sha monghalamwenyo yavo. Ondi na elineekelo kutya omaudano otaa kaleke ovanyasha ve lipyakidila,” Tangi ta ti. Okwa ti shima ovanyasha ve lipyakidila nena otashi eta po eemhito doilonga mokati kavo. Ta ti naasho otashi lwifa oimbuluma moshilongo.

Ehangano loHeicky Land Surveyor odula eyi ola yambidida ospana yoLion noshimaliwa N$2 5000. Lion FC ohai danene molixa ititatu moshitukulwa shaShana. Oimaliwa oyokuvatela momalweendo, oumbidja noipumbiwa aishe yoLion FC.

Omanga Olomakaya okwa yandja oshimaliwa N$500 komudani dingi woMighty Gunners Ladies. Ta ti elalakano okuxwaxwameka oomeme va kufe ombinga momaudano okatanga kokeemadi koomeme.

Heicky Land Surveyor oya vatela shihapu moudano. Mo 2025 oya yandjele N$7 000 kolixa onhinatu moshitukulwa shaShana omanga mo 2022 kwa li ya yambidida oshitukulwa shaShana nomidjalo eshi sha ka kufile ombinga kekopi loshifokundaneki sho The Namibian.

Tangi okwa ti ota twikile nokuyambidida omaudano teshiningi nokuli oshinakuwanifwa shaye shefiku keshe. “Omaudano ohaa tula omikalo momunhu. Ohaalombwele ovanhu valongele kumwe nohama eta ovanhu veli kaleke kokule noinima ii,” ta ti.

Tangi okwa indila omahangano opaumwene ayambidide omaudano tati otashi eta elunduluko lakula paliko moshilongo.

-amwanyekange@nepc.com.na