Auleria Wakudumo
Kopano ya National Unity Democratic Organisation (Nudo), inyazize mubuso kakupalelwa kutatulula kutepelela kwatokwahalo yamilyani mwalipatela zamubuso mwanaha kaufela. Nudo nefile mamela kuli mayemo amakete mwanaha azwelapili kufokola mi abeya bupilo bwabayahi banaha Namibia mwakozi. Mwaliñolo lene lifilwe kwababihi bamakande kimembala wakopano mwandu yamilao Vetaruhe Kandorozu, kopano neize tokwahalo yamilyani mwalipatela ni lipatelanyana zamubuso ise ifitile famayemo abilaeza, nihakubile nilisepiso kwaLikolo la Makete ni Pabalelo ya Sicaba kuli milyani ilekilwe.
Kandorozu nabuzize hala manzwi alikwambuyu wamakete Esperance Luvindao kuli mayemo amilyani ahulile kutaha fa 60% kasamulaho akuamuhela milyani la 27 Lungu ni 15 Kandao 2026. Nasusuelize kuli milyani yemiñata yabutokwa isiyala ili siyo kwalipatela ni lipatelanyana mwanaha kaufela, kulwanisana ni manzwi alikwambuyu Luvindao. Naize milyani yeo ingelezi cwalo ni milyani yababakula pilu, milyani yakutaba, mikotana yakuzwiseza zemaswe kubale babapazulwa, hamoho cwalo ni makondomu.
“Niti yazene tisizwe kimapilusi feela asikai, milyani yamezi yakunwa ni yakutaba yesikai, haneli lipatela lisebeza ni milyani yekutezi fafasi,” nabulezi. Membala wandu yamilao nabulezi hape kuli lipatela zeñwi lihapelezwa kukalima milyani kwalipatela zakwamukunda. Linyazo zeo litaha kulatelela lipilaelo zasicaba hala tokwahalo yamilyani kwalipatela zamubuso, mi hañata babulelelwa kuli bayoitekela milyani kwalipatela zakwamukunda.
Kandorozu hape nafitisize lipilaelo hala lipiho zakuli mapazulelo amubuso hana milyani yakutaba batu kuli balobale, kuhapeleza kuli bakuli bakashezwe kwalipatela zakwamukunda kasinyelo yamubuso. Nanyazie Mueteleli wanaha hala manzwi ane abulezi, akubilaela hala tokwahalo yamilyani, mi naize mubuso uswanela kupatalaza nako yeo milyani ikafumaneha. Likolo la makete, neli file piho la 17 Kandao 2026, kupatalaza butata mwakuleka milyani kono nelisepisize kuli milyani ikalile kufita kwalibulukelo la naha. Likolo neli ize lisweli kusebeza katata kubona kuli tokwahalo yamilyani yatatululwa, nikuli milyani ifumanehe mwalipatela ni lipatelanyana mwanaha kaufela.