SWAKOPMUND –  Likolo la njimo lilumezi sikwata sa babafaela kwalikiliti zaErongo ni Hardap kasamulaho akuzuha kwalinzie zalihalaupa. Likolo libulela kuli kuzuha kwalinzie zalihalaupa nekulemuhilwe sapili kwaHomeb, mwasilalo saUtuseb, libima zemashumi asilezi kuzwa tolopo yaWalvis Bay, hamoho cwalo ni mwasilalanda sa Daweb mwasikiliti sa Hardap.

Sibuabui walikolo Romeo Muyunda naize linzie kanako yacwale lisa sweli kufufa, mi mwasikiliti sa Erongo neli lemuhilwe kwasiteshini sa lipatisiso saGobabeb kwamukulela wanuka
yaKuiseb, kuyanduluka libima zemashumi aketalizoho mwasibaka saNamib-Naukluft Park, hala likiliti kaufela za Erongo ni Hardap.

“Mwasikiliti sa Hardap, kuambalakana kwalinzie kuyanduluka kuzwa Alt Duwisib, libima zelikana mashumi asilezi kazeketalizoho kuzwa kwaMaltahöhe, mbowelaupa kuliba Helmeringhausen. Kuzuha kwalinzie kutaselize masimu alishumi kaaketalizoho, kuyanduluka sibaka sesibato likana libima zemyanda yemilalu ni zemyanda yemine,” nabulezi.

Muyunda nabonisize kuli linzie likona kulikana 5 000 kuisa 10 000. Naize kitaba yezibahala kuli linzie lica limela, mi zeñata likona kusinya mafulelo ni limela. Haiba halitibelwi, likona kutisa sinyehelo mwamasimu. Likolo lilumezi likwata zefaela zetamelezi lifaela fahalimu alimotikala. Muyunda nakupile swalisano ya sicaba mi naize likolo likumalezi kubona kuli lilwanisa kuzuha kwalinzie nikufukuza sinyeho kwamafulelo ni masimu.