Abraham Mwanyekange

Omunani kwa li wongudu yo-Independent Patriots for Change Erastus Mwaafa Shipanduleni okwa waimina ongudu yoSwapo Olomakaya, sha ningilwa mOngenga koshitukulwa shaHangwena. Ta ti ke na vali elinekelo mo-IPC okweeta omalunduluko moNamibia.

Shipanduleni okwa li omuunganeki nomuxwaxwameki wongudu yo-IPC e lile po oshitukulwa ashishe shaHangwena. Momahoololo a dja ko ookansela okwa li yo oye omuulikwahoololwa wa-IPC moshikandjohoololo shaNgenga.

MuJanuali neudo okwa shangela ongudu yo-IPC kutya okwa hala okufiya po ongudu. Imwe yomwaayo kwa li a tumbula tai mu fiifa po ongudu ongaashi, okukala ina valulwa, noinima tai ningwa ndele kave na ouyelele washa. “Ofye eengudi da-IPC ndele fiyo okonena ohatu ningwa ashike nai, Inatu valulwa. Nonande twa mona oimaliwa komutumba wopashiwana onghee ngoo hatu longifa oimaliwa okudja meendja to detu,” ta ti.

Okwa ti efimbo a kala ko-IPC okwa longifa oshimaliwa shaye sha koya N$14 000 okudja modula 2020. Okwa ti oshe mu eta a kanife eenghono dokutwikila nongudu molwaashi efimbo ashike laye tali pu po.

Eshi ta tambulilwa moSwapo kuhamushanga wongudu Sofia Shaningwa, Shipanduleni okwa ti Swapo oye ashike ta dulu okweeta elunduluko li liwetikile moshilongo.

“Swapo okwa yambekwa novayambididi, no-IPC ite shi lundulula osho nandenande. Kutya nee oto itavele ile ito itavele, teelela ashike omahoololo o 2029 kutya Swapo ota ka findana po omahoololo,” ta ti.

Okwa fatulula kutya Swapo oshilongifo shokuxumifa eliko loshilongo komesho molwaashi oyo ongudu ye lineekelwa kOvanamibia vahapu.

Shipanduleni okwa pula ovayambididi vo-IPC ovo a pa oukalata voukwashilyo opo ve mu landule kongudu yaye ipe.” Ame onde litalulula ndele handi ningi etokolo hano nanye ileni oku. Okatanga oke li momake eni paife onde mu teelela.”

-amwanyekange@nepc.com.na