Opolisi moshitopolwa shOtjozondjupa oya manga po omulumentu gwomimvo omi-35 ngoka a adhika niingangamithi ya yooloka. 

Omunambelewapitithi omukuluntu gwopolisi moshitopolwa shOtjozondjupa Maureen Mbeha okwa ti oshiningwanima shoka osha holoka Etiyali mondjila Outjo- Otjiwarongo. 

Okwa ti, omulumentu ngoka okwa adhika niingangamithi ngaashi Cannabis yondjundo yoogalama 2 782 osho wo Mandrax dhi li poogalama 999. 

Iingangamithi ayihe mbika oyi na ongushu N$259 000. 

Omulumentu ngoka anuwa oha zi kOutjo nota holoka mompangu oshiwike shika. 

Natango okwa lopotwa aantu ye li 203 ya mangwa po sho ya adhika niingangamithi ya yooloka inaayi pitikwa moshilongo momwedhi gwaMaalitsa aguke. 

Sha ikolelela kuuyelele wa gandjwa komupopiliko gwopolisi moshilongo Kauna Shikwambi, aantu mboka ya mangwa po, omwa kwatelwa Aanamibia osho wo yamwe yokiilongo yokondje. 

Okwa lopotwa kutya aantu ye li 193 Aanamibia, Aa-angola yatatu, Aatanzania yatatu osho wo Omukongo gumwe,” ta ti ngaaka. 

Shikwambi okwa ti, iingangamithi ayihe mbyoka oya lopotwa ya mangwa naantu. 

-vkaapanda@nepc.com.na