Abraham Mwanyekange
Ovashingi veetaksi unene odo hadi yi oinano ile meedoolopa domonooli otaku hokololwa ve kwetwe kohole yeedaisa. Eekastoma tadi ti ohave va kaleke meetuwa davo manga tava te uudaisa.
Kastoma weetaksi doinano ile Maria Johannes okwa lombwela Kundana ta ti okwa lulilwa kovashingi tava te oudaisa.
“Paife ohamu kala ashike motuwa mwa paakingwa tamu ti omwa teelela kastoma umwe mu ye mboli omushingi ota te ashike oudaisa vaye, oho udu ashike ovanhu tava ti ‘Kom’,” ta ti.
Johannes okwa ti eto leedaisa ohali kateke ovalondi va ka fike oku tava i pefimbo molwaashi omushingi oha dulu okwaanyena pooudaisa. Okwa indila ovanataksi va kale vafimaneka eekastoma tete komesho youdaisa.
Mathew Johannes omushingi wo seven seater okwa lombwela Kundana ta ti oudaisa ohava denge po oujda. “Pokapale ohapu kala pwa ndjena molwaashi efimbo limwe eekastoma oda pumba,” ta ti.
Johannes okwa ti moudaisa oha ningi mo oshimaliwa shidulife shomopate. Omanga Martin Jimmy okwa ti ke wete ta tula po okuta oudaisa omanga oimaliwa yaye e yi ya likile po ine i mona mo.
“ Fiku limwe onda likile po N$4 000. Paife onda hala oku a mona mo,” ta ti. Jimmy okwa ti oudaisa ovadjuu okweefa. Okwa indila kovashingi vakwao opo vaha ninge oihakanwa yeedaisa.
E lidipaa medina loudaisa
Komufala wopolifi mOshana Sakaria Lungameni okwa koleka oshiningwanima shomulumenhu weedula 33, sha ningwa mOmaandaxa potundi 13H00. “Omulumenhu okwa ta li ende kopate mondjila yakula mOshakati pOneshila. Nokudja opo ololi oye mu lyata nokuxulifa,” ta ti.
Lungameni okwa ti omulumenhu okwa hokololwa a tokelwa ta te oudaisa koundingosho vokOngwediva.
Okwa ti omulumenhu okwa likifa po ongodi yaye yopeke, ongodi yakaume kaye oshoy o okatemba kokabesa. Aishe okuya kumwe oi na ongushu N$6 000.
Okwa ti nakufya odalele yokOpuwo novapambele vaye ova shivifilwa nale omanga omakonaakono opolifi taa twikile.
Lungameni okwa lombwela Kundana ta ti omwedi wa dja ko mOndangwa ope na ovanhu ve litwa neembele sha dilila peto loudaisa. “Oudaisa kau li paveta nopamhango yoshilongo na inau pitikwa. Naavo tave shi ningi nava kale ve shi shi kutya nge otwe va kwata otava ka taalela oveta,” ta ti.
“Nashi kale sha yela kutya opolifi yaShana otai ka manga po aveshe ovo hatu ka hanga tava te oudaisa. Kashi fi etilifo ndele otwe lipaka mo. Nashi ye okawi nokawi,” Lungameni ta londwele.
-amwanyekange@nepc.com.na