Metiyali, omulumentu gomimvo dhopokati okwa mangwa nomahooli inaaga pitikilwa moNamibia okuza koAngola.
Sha ikolela kuuyele wa gandjwa komupopiliko gopolisi moshitopolwa shaHangwena Kuume Itumba, omulumentu ngoka okwa li a adhika nohauto yoLand Cruiser yi na omandini ge na omahooli ge li 65.
“Ohauto ndjoka okwa li ya kwatwa ethimbo tayi zi moAngola noya li ya kwatelwa momukunda Onamunama. Ohauto ndjoka nayo oya mangwa po,” ta ti ngaaka.
Ta ti, omufekelwa okwa li ta pitile koomweelo ndhomooha, ta iyakele moNamibia.
Itumba okwa ti uupyakadhi mboka wokuyakela omahooli moNamibia otau ende tau indjipala, nonando opolisi otayi kondjo okukeelela uupakadhi mboka wu holoke.
Ta ti, opolisi oya hulako oongaku, na itayi ka dhana nando naantu mboka taya tsikile okuyakela omahooli moNamibia.
“Kehe ngoka ta ka adhika ta landa nenge ta landitha omahooli ga za koAngola, ota ka mangwa po,” ta popi ngaaka.
Itumba natango okwa indile moshigwana shi kale tashi lopota mboka taya landitha omahooli ngoka momagumbo.
Omahooli ngoka ohaga ka landithwa N$330 nenge N$320 mendini lyoolita 20, oshowo mokandini koolita ntano N$60.
Omahooli agehe kumwe ga mangwa po otaga tengenekwa ge na ongushu N$21 500.
Okwa ndhindhilikwa omahooli ngoka haga landwa unene kaahingi yootekisa oshowo mboka haya hingi oondjila oonde.
“Iipotha yi na sha neyako lyomahooli itayi ka talika ko we onga iipotha iishona na otayi ka ungaungwa nayo lela neitulemo,” ta popi ngaaka.
Ta kumagidha oshigwana shi ikaleke kokule nokukutha ombinga miiningwanima yi li ngaaka.
Omahooli oga konekwa taga landithwa unene miitolwa yokonooli, Omusati, Oshana osho wo Ohangwena.
Opolisi omumvo gwa yi oya li ya popi kutya omahooli ngoka taga landithwa moNamibia okuza koAngola, otaga shunitha oongeshefa dhomahooli moshilongo pevi.
“Aahingi yiihauto otaya tondokele komahooli ngoka oshoka anuwa oge na ombiliha, omanga aashingithi yomahooli moshilongo itaaya landitha we,” tayi ti ngaaka.
Caption: Miipandeko…Ohauto yoLand Cruiser ya adhika ya londeka omandini gomahooli 65
vkaapanda@necp.com.na