Auleria Wakudumo 

Opolifi momudingonoko waWalvis Bay otai konakona oshibofa shekengelelo omo omukainhu weedula 51 a kengelelwa shi fike po N$777 568 komunhu ehe shivike. 

Omupopiliko wopolifi Chief Inspector Elifas Kuwinga okwa koleka ta ti omukainhu vati okwa kengelelwa eshi a yandja ouyelele waye wombaanga komunhu oo e mu shivifila kutya oha longo mombaanga yoBank Windhoek. 

Otaku hokololwa omukainhu a kengelelwa oshimaliwa shaye mOmaandaxa lwopo 14h58 no16h00 lwaapo. 

Oshimaliwa vati osha dja kombaanga okupitila momapungulilo okomalungula aBank Windhoek. 

“Omufekelwa okwa dengela nakuningwa oshihakanwa ndele te mu shivifile kutya oku li ha longo koBank Windhoek noku mu pula omapulo fiyo nakuningwa oshihakanwa ta yandje ouyelele waye nokukanifa oshimaliwa,” Kuwinga ta ti. 

Kuwinga okwa holola ta ti fiyo opapa opolifi inai pondola okutula omufekelwa moipandeko na kape na oshimaliwa sha monika po. 

-wakudumoauleria@gmail.com