Opolifi koshitukulwa shaKavango East otai konakona oshibofa omo ovalumenhu vavali vati va landifa po oikulya yoshikukuta pefimbo kwa li tava twala oikulya koRundu.

Oshiningwanima osha ningwa Etitano efimbo lomutenya.

Omukulunhu koshikondo shokukonakona oimbuluma, koshitukulwa shaKavango East Omupedu Commissoner Bonifatius Kanyetu okwa hokolola ta ti ovafekelwa okwa li tava shingi ololi ya humbata oikulya. Okwa ti ovafekelwa ova kanghameka ololi momikunda ndele tava tameke okulandifa oikulya.

Otaku hokololwa kutya omulumenhu weedula 48 okwa kwatwa po konima eshi a dopa okuyandja ouyelele kopolifi kutya openi a hanga oukutu voufila nomakende omaadi.

Omulumenhu ou okwa landa oikulya kovafeklwa ndele ta ka tula mondingosho yaye. 

Vamwe vovakwashiwana pomudingonoko opo ova lopotela opolifi kombinga yoshikumungu eshi.

Opolifi oya ti oikulya oya kufwa ko ndele tai twalwa koshitaashi shopolifi koRundu.

Oonakulandifa oikulya ova faduka po, opolifi oye lipyakadila noku va konga.

-fhamalwa@nepc.com.na