Auleria Wakudumo 

Ovakwashiwana vomomukunda Okaonde-Oshitha Shembungu moshikandjohoololo shaNesi ova pandula epangelo eshi le va kufa momilema nokupewa olusheno pomudingonoko wavo. 

Kansela woshikandjohoololo Onesi, Festus Petrus okwa holola kutya epangelo ola eta tete pomudingonoko oo tuu oo olusheno pofikola Oshitha Shembungu Primary odula ya dja ko. 

“Nande olusheno la li la fika pofikola, ola li li li natango kokule noshiwana osho sha eta tu ye nomutumba naNored opo va longife kashona oko ve na po ye a dule okuandjaneka olusheno pomudingonoko,” Kansela ta holola ngaho. 

Okwa ti Nored ine likwata okutula opena pembo nokudimina opo a tule olusheno momalukanda avali, Okandjambona nOndumbo. 

“Eshi hatu popi ngaha, ovanambelewa vaNored ova tula nale etemo momupini okumeta, okutula ko eepaala dolusheno naikwao. Natango otwa teelela yo olukanda likwao hali ifanwa Oukwananga li kale la tulwa olusheno,” Petrus ta ti. 

Kansela okwa holola kutya exumokomesho eli inali dja pokapala kayela. Okwa ti, eindilo eli ola li la ningwa momudo 2016, la hovela nelalakano okutula eefikola adishe moshikandjohoololo shaNesi Olusheno. Monena, eefikola adishe 28 moshikandjohoololo odi ina olusheno. 

Umwe womovanamukunda, Fillemon Jyatileni weedula 57 okwa holola olupandu kepangelo eshi le va etela olusheno, la tavakana eengoya fiyo omumufitu mofuka yavo. “Otwa li twa uda nawa odula ya dja ko eshi ofikola yopomudingonoko wetu ya mona olusheno. Okwa li nokuli tu na omalalakano okunana olusheno okudja kofikola hatu eta pomaumbo etu nonande pe na okanano,” Jyatileni ta holola. 

Jyatileni okwa ti mokudja kohambo onghelainya, okwa hanga omambakumbaku olusheno novanambelewa va hovela oilonga okutula olusheno momalukanda oo e li popepi navo. 

Nenyanyuko, ovakwashiwana ova ekela mo eenghuwilili nokupandula epangelo eshi la kula ondjaba omayoo. 

“Ngaashi ame, eepala dolusheno oda enda ashike mepya lange paife. Inandi pumbwa vali okunana olusheno okudja kofikola shaashi ola etwa popepielela naame,” Jyatileni ta holola nenyanyu.

Ovakwashiwana ova holola kutya itava ka tyaatyela vali eengodi davo kokule. Ova ti oikunwa poundingosho wavo osho yo momaumbo paife nayo otai ka pita noupu, ya talala nawa. 

Vahapu ova hovela nale okuninga eemhangela deengeshefa odo hadi longifa olusheno ngaashi omashina okutwa oilya nadikwao. 

“Ame onda hala nokuli okulanda eshina eli hali kweya oikulya yeengobe. Ohandi ka lotokela nale keefitola opo ndi pule kutya oli na ingapi,” Jyatileni ta holola. Kakele keengeshefa noukunwa va talala, ovakwashiwana ova ti omukaa nao otau ka tulwa kekaku pomudingonoko wavo. Ova ti olusheno otali va kwafele okukala hava lande okavelelwa kuvahapu nokutula meekila dokutalaleka. 

Ovakwashiwana ova holola kutya ihava lande vali eeshi dihapu shaashi ove na ashike omukalo umwe wokunyaneka, oo hau lolokwa noupu. 

“Omilema, oikunwa ipyu, oushi va nyanekwa, okekaku. Paife omukunda wetu oo wa talika ko ongomufitu weendjaba molwoupopepi wavo woifitukuti owa dja ko. Ou ta ti epangelo itali longo, ne uye komukunda wetu,” Jyatileni ta holola ngaho. 

-awakudumo@nepc.com.na