Opolifi moshitukulwa shaMusati otai konakona oshibofa shomulumenhu vati a kwatwa okaana kaye keedula omu-17 onghonga lwoikando ya yooloka.

Vati omulumenhu ou okwa kwata okaana kaye onghonga lwoikando ya yooloka ndele te ka ningile omatilifo nekatana.

Oshiningwanima osha ningwa neudo okudja ketameko lodula meumbo lavo komukunda Ohendjeno moshikandjohoololo shaKalongo.

Omukulunhu wopolifi moshitukulwa shaMusati Commissioner Ismael Basson okwa koleka oshiningwanima eshi.

Opolifi oya hokolola tai ti omulumenhu oha ufana okaana monduda yaye yokunangala ndele te ka kwata onghonga.

Vati okwa kufa ekatana ndele te ka ningile omatilifo kutya ngeenge okaana okeshi popi ote ka tete omutwe. Otaku hokololwa kutya okaana oka lopotela ina fiyo ouyelele tau fiki kopolifi.

Opolifi oya hokolola tai ti oya taalela omashongo oibofa yomakwatonghonga taa lopotwa kwa lata unene tuu ngeenge ounona tava ningilwa omatilifo.

Ounona paife ova ninga oihakanwa yokukwatwa onghonga kovapambele vavo ashike iha va lopota pefimbo shaashi ohava ningilwa omatilifo omadipawo. Ovadali va popya naKundana onghela, ova hokolola tava ti paife ohava kala tave li pula ngeenge va fiya ounona vavo momaumbo nooxe kutya pamwe otava longelwa omunyonena wopaixulo.

Okwa lopotwa oibofa ya yooloka younona tava kwatwa onghonga kooxe osho shi li tashi limbilike moshiwana.

Opolifi moshitukulwa shaHangwena otai konakono oshibofa shomukulunhufikola a kwata okaana kaye onghonga osho yo natango shomupolifi a kwata okaana kaye onghonga.

-fhamalwa@nepc.com.na