ǀAEǁGAMS – Ministeris sîsengu dis ge ǁgâu!nāpe sîsenaon ǁkhâkorobe !khō!oamaris di ǀgapiǀgapihes 4.15%gu disa ge ǂanǂan, 1 ǂNūǁnâiseb 2018 dis ai ge sîsentsoatsoase, Nē ǀasa !khō!oamaris ge xūn ǂganǀgaub !nâ ra hâ ǂharodi tsî ǀgui persenti ǀaros ai ge !gao!gaohe.
!Khō!oaǀgaugu Xoaǁguib ǁGâu!nāpe Sîsenaon dib, ǂHanub ǂHanusi Xoaǁguib 15 Taraǁkhumuǁkhâb 2017 dib, ge !gāsase ǁKhâkorobe !khō!oamaris tsî Hāǀaro ra ǂgaoǀkhādi tsîna ra ǁgui!ā tsî kurikorobe nî hâ mariǀarodi tsîn !aroma soa-e dī hâ. ǁNā-amagas ge 1 ǂNūǁnâiseb dis ai ge hâ ǀaros 4.15%gu disa sao rase ra mûsen: N$1564.39 ǁkhâkorobe, N$361.29 wekhekorobe ra !khō!oa khoen !aroma, N$72.25 ǀgui tsēs ai, N$9.03 ǀgui iri ai tsî N$45.15 ǀgui tsēs !aroma ǁnā khoen hîa !gaeǂgāsa tama xawe koro irgu xa ǀorose ra sîsenna, xawe Sontaxtsēs di ǂhaitsi sâtsēde !khōǂgā tama hâse. Sîsengu ǂHanumās di ǂguro !âb di 7s (ǂHanumās ii 2007 kurib dis) !nâ i ge a xoasa, mâ ǀguiǀguibe sîsenao-i hîa xoaǁguisa sîsens irgu xa !nāsase ra sîsen-i hoa-i ge ǁnā !nāra irgu marisa hāǀaro rase nî mātarehe.
ǁGâu!nāpe sîsenaon !aromas ge nē hāǀaro ra marisa irga sîsen!nās !aroma a N$13.54, sîsengu hîa Sontaxtsēs ai ra dīheb !aroma N$18.06 ǀgui ira, ǂhaitsi sâtsēdi ai N$18.06 ǀgui ira tsî N$90.30 !gaeǂgāsa tama khoe-i hîa tsēsa koro irgu xa ǀorose ra sîsen-i !aroma. Ministeris Sîsengu dis di Permanende Sekretareb, Bro-Matthewb ge ǂhaitsi māǂui-i hîab ge ūhâ-i i !nâ !gā!gā tsî ge mî nē ǀgapiǀgapis ra !gaoǁguihesa “ǂÛn tsî ǂauxûiba !khōǂgā tama āxūn, Omn, ǁGam-i, !Nanǀgaib tsî !khauǁnuib di ǂganǀgaugu !kharu ge 12 ǁkhâgu din ai ǀnōhesa. ǂHanusise NSA xa 1 ǂNūǁnâiseb 2018 ge māǂuihe ǂganǀgau !gôagu ge ra ǁgau nē ǀgapiisa xūn sao rai hâsa: 2.5% ǂûn tsî ǂauxûiba !khōǂgā tama āxūn ai, 3.8%ga omn, ǁgam-i, !nanǀgaib tsî !khauǁnuib ai.
Nēpa xu ra gausens ge ǁaeguǀnōb ǀgapiǀgapis nē !âsa tsîs ge ǁnā-amaga ǁGâu!nāpe sîsenaon marisa 4.15 persentgu ǀkha go ǂnûikhâihe. Nēs ǀkhan ge hoa sîsenmā-aona ra ǂganhe in ǀasa mātareǀgauba tsoatsoa-ū tsî xawe tā nē xoaǁguisa mātareǀgaub !naka ǁgâu!nāpe sîsenaona mātare.