Ouminsteli womidingonoko, eefuka nomapashiyono owa tulilapo ovakwashiwana omilandu dipe osho yo eendjidikila unene ngeenge tashi ya pokumina edu moshilongo. 

Oshitopolwa shanooli osho shimwe sha didilikwa shi na eenhele dihapu hadi dulu okuminwa edu ngaashi eli hali longifwa okutunga eepate deengalama molwomatale aa e li mo ahapu. Oupyakadi owa tameka ashike eshi ovamini vomadu ngeenge va mane okulonga oilonga yavo, ihava file vali eenhele edi va fula omadu oshisho. 

Ouminsteli owe ya po nee nomilandu dipe di na sha naava ve hole okumina omadu ngaashi momatale. 

Edi oda popiwa koshilyo shouministeli Timotheus Mufeti kutya, keshe omunhu ta ka hangika ta fulu edu na kale e na ombapila yeufo, okudilila keembonge davo. 

“Kutya nee okwa hangika e na ololi i li kopate, ile otuwa ya humbata edu, nai kale i na ombapila yeufilo lokututa edu olo,” ta ti. 

Okwa twikila kutya ova didilika ovanhu vahapu ve hole okumina edu, ndele peenhele apa ta pa minwa ihapu wapalekwa vati. 

“Ovanhu shima va mane okulonga oiloga ohava fiye ashike eenhele di na omalambo akula, oo nokuli a nyikila novanhu oshiponga, nohaa kala taa monikifa onhele nai,” ta ti. 

Okwa twikila kutya natango ouministeli owa tula po yo omulandu kutya omalelo opamifyuulukwalo ngeenge taa yandje eenhele dokumina omadu, nao naa kale yo e na eefelelo lonhele okudilila kouministeli ngeenge onhele yonhumba oi li ngaho monghalo osho yo ponhele tai dulu okukala tai minwa edu. 

Mufeti okwa popya yo ekakeko leenailona olo nalo vati la ninga lihapu moshilongo nola kakeka onghalo yomhepo. 

“Mafiku peengaba itapu ka pita vali oinima ya nika eenailona tai ya moshilongo, shaashi ohai nyateke oshilongo. 

-taimihaihambo2000@gmail.com