Auleria Wakudumo 

Kansela woshikandjohoololo shaKhorixas Eddie !Nanub okwa holola kutya ota ka tula moilonga eeproyeka da yooloka opo a xwepopaleke okuhe na oilonga moshikandjohoololo. 

!Nanub okwa ti omwaalu wovanyasha vahapu moKhorixas ohau mono oyuuyemo. Meengundafana naKundana, kansela okwa holola kutya ota ka ufana ovanawino mokundungika oshiwana kombinga yokutota po eengeshefa. 

Kansela eshi okwe shi tula nale moilonga eshi a ufana oNational Youth Council (NYC) opo ve linyike komilungu novanyasha vo va kundafane kombinga yomaudjuu a taalelwa kovanyasha moshikandjohoololo. 

Eshi osha li sha ningwa muJanuali neudo. Ovanyasha moshikandjohoololo ova li va holola kutya ova hala epangelo la yambula po ofikola yopaungoba yaKhorixas. 

Ovanyasha ova ti ova hala oilongwa yomofikola yopaungoba i wedelwe opo va dule okukala tava hoolola osho va hala okulilongela pehe na omangabeko. Kansela okwa holola kutya ota ka ongela ovanyasha luvali modula, omo ta ka ifana ovanawino ve uye okundungika ovanyasha. !Nanub okwa holola yo kutya ota ka nyumuna oproyeka yeedopi moshikandjohoololo. Oproyeka ei oya li vati ya fya po molwaashi kape na ou e na owino wokulongifa omashina okufoloma eedopi. Mopaife, omashina ohaa longifwa koitukulwa imwe. “Onda hala yo okueta ofaktoli yokuhondja oikutu moKhorixas. Onda didilika kutya ovanyanyamaulu vahapu ove na ehalo mokuhondja,” Kansela ta holola ngaho. 

!Nanub okwa holola yo kutya ovanyasha vahapu moshikandjohoololo ova shololifa shaashi ihava fiki koyoongalele. Ngaashi oshiongi osho sha ningwa ko-NYC, omwaalu muhapu wovanyasha inau holoka. 

Kansela okwa ti otava ka nghonopaleka omakwatafano pokati kombelewa yaye novanyasha opo omatumwalaka a kale taa fiki kuvo pefimbo vo va kale tava holoka momwaalu muhapu. 

!Nanub okwa didilika yo kutya opolitika moshitukulwa nomoshikandjohoololo shaye ohai imbi ovanyasha veengudu da yooloka va ongale ponhele imwe. Okwa ti vahapu ova tula unene opolitika komesho nove wete ashike keshe osho tashi ningwa sha nyama kopolitika. 

-awakudumo@nepc.com.na