Opolisi moshitopolwa shaKhomas oya manga po aantu ye li yaheyali taya fekelwa oyo ya kala nokuyuga aantu iimaliwa moshilandopangelo.
Sha ikolelela kopolisi, aantu mboka ya li ya adhika niimaliwa tayi fekelwa ya yugwa aanangeshefa, oya adhika wo natango niihauto anuwa ya longithwa okuya ontuku.
Omaandaha goshiwike shika aakiintu yaali okwa li ya yugwa iimaliwa N$162 000 poositola dhoMaerua mOvenduka, omanga omwedhi gwa yi, aafuthi ya li ya ya yi ontuku noshimaliwa N$480 000.
Otaku hokololwa N$18 000 yali ya adhika nomufekelwa gumwe omanga gumwe kwa li aadhika noshimaliwa N$8 700.
“Oohauto mbali odha li dha kwatwa ko kopolisi,” opolisi ya ti ngaaka. Otaku hokololwa ohauto yimwe ndjoka kwa li ya longithwa miimbuluma ayihe iyali, ya yina gwagumwe gomaafekelwa ngoka natango inaa kwatwa kopolisi.
Opolisi otayi indile kehe ngoka e na uuyelele mpoka pe na omulumentu ngoka a lopotele opolisi mendeelelo.
Aalumentu mboka anuwa okwa li ya mangwa konima opolisi sho ya li ya yi molukongo lwa kwata miiti moshilandopangelo.
Opolisi natango oya indile oshigwana shi kale tashi longele kumwe nopolisi opo mboka taya longo iilonga inaayi uka moshilongo ya mangwe po.
Oshiningwanima shoka osha holoka ashike omasiku gaali ga piti po sho aakwashigwana yaChina yatatu ya li ya yugwa oshimaliwa N$60 000 moshitopolwa shaShikoto. Sha ikolelela kuuyelele wa gandjwa kopolisi oshiningwanima shoka osha holoka moshanga shomutenya momudhingolko gwOmuthiya konima yoChoppies mEtitano.
“Aalumentu ye li yatatu okwa li ya tete ondhalate yolusheno nokupita okuya mositola yAachina mboka. Oya li ye ya ulike oondjembo omanga gumwe e na ombele,” ta hokolola ngaaka. Otaku hokololwa kutya Aachina mboka opamwe nomuniilonga gumwe ya li ya lombwelwa ya ulike mpoka pe na iimaliwa, omanga ya ulikwa omilungu dhoondjembo.
Aafuthi mboka anuwa okwa li taya popi Oshiwambo, noya li ya zala uumbale wa ya sigo omomeho opo kaaya dhimbululwe.
Opolisi moshitopolwa shaShikoto oyi li molukongo lwaalumentu mboka. Tayi ti, kehe ngoka wu na uuyelele kombinga yaafuthi mboka, oshigwana nashi lopotele opolisi opo aantu mboka ya kuthwe mo mokati koshigwana.