Aaleli yoshilongo oya topolelwa iitopolwa moshilongo hoka taya ka kala aapopi yesiku, sho taku ka dhimbulukwa esiku lyemanguluko ngula.

Konooli, oshitopolwa shaShana otashi ka popithwa kOmuprima Elijah Ngurare, Ohangwena otayi popithwa kuminista gwomayambulepo goondoolopa niitopolwa yokuushayi James Sankwasa, Omusati oku na Ericah Shafuda omanga kOshikoto taku kala Veikko Nekundi.

Oongoloneya yiitopolwa yokonooli oya kala nokuhiya oshigwana opo shi ka tyapule nokudhimbulukilwa pamwe esiku lyemanguluko, hali dhimbulukiwa omumvo kehe momasiku 21 gaMaalitsa.

“Ngaashi kwa tokolwa kOmupresidente gwoshilongo Netumbo Nandi-Ndaitwah kutya esiku ndyoka otali ka tyapulilwa miitopolwa ayihe yoshilongo, inatu hala nando omukwashigwana gumwe a kale inaa holoka,” taya popi ngaaka.

Oongoloneya oya totha mo ondoolopa kehe moshitopolwa moka taya ka tyapulila.

Minista gwomauyelele nomakwatathano gopaungomba Emma Theofelus okwa popi kutya omasiku 21 gaMaalitsa Namibia ota gwanitha omimvo 36 dhemanguluko, onkene osha simana okundjokonona shoka sha holoka ethimbo oshilongo sha li muukoloni nankene sha manguluka osho wo mpoka sha thikama nena. “Esiku ndyoka hali dhimbulukiwa nokutyapulwa omolwemanguluko lyoshilongo, oha li simanekwa omolwomapendafule ngoka ga hulitha sho taga kondjele oshilongo shi manguluke osho wo okutumbaleka mpoka oshilongo sha thikama nena,” ta fatulula ngaaka. Omunangeshefa gwomOkahao Taati Shaanika moonkundathana dhopangodhi noshifokundaneki shika okwa ti, oya nyanyukwa sho esiku ndyoka tali ka dhimbulikilwa mondoolopa yawo. 

Ta ti, eyetopamwe lyoshigwana otali ka hwahwameka nokuyambula po ondoolopa yawo pamukalo gomangeshefelo osho wo eliko lyoshimaliwa momudhingoloko gwOkahao,” ta ti ngaaka. 

Omushingithi gwiikulya Maria Niilenge okwa ti, shoka sha tokolwa nuumvo osha simana kuyo. 

“Etyapulo lyemanguluko otwa kala noku lyi mona ashike kooradio dhomizizimbe osho wo tali popiwa mooradio, ihe nuumvo nani otatu li mono nomeho,’’ ta pandula ngaaka. Ta ti, etokolo ndyoka ewanawa oshoka otali gandja ompito koshigwana ashihe shi tyapule nokuuva ondjokonona yaNamibia, ta gwedha ko wo kutya nayo otaya ka mona oompito dhokushingitha iinima yawo. 

-vkaapanda@nepc.com.na