OKONGO- Omunambelewawiliki welelo lodoolopa yaKongo Jackson Muma okwa ti ota ka longa nondjungu noku na efaneko opo a dule okuyambula po odoolopa yaKango nokukwashipaleka kutya oshiwana osha mona omadu.
Muma opo ashike a ulikwa omudo wa dja ko a ninge omunambelewawiliki wodoolopa yaKongo ashike moule wemweedi odo a kala ko oshiwana osha panda oilonga yaye molwaashi ope na elunduluko liwa.
Muma okuna owino yokulonga meedoolopa molwashi okwa longa efimbo lile kodoolopa yaNgwediva, naashi otashi ulike kutya Ovakongo ove li momake awa shaashi ova mona omunambelewiliki a longo nelitulemo.
Pefimbo New Era a ninga eenghundafana naMuma, okwa hokolola ta ti elelo lodoolopa yavo ole lipyakidila nokutula omayakulo keenhele domadu di li 55 oko taku ka tungwa omaumbo oshiwana.
Okwa yelifa ta ti konhele yedu oku otaku tulwa omeva, olusheno nopate.
“Natango elelo lodoolopa ola dimina okukala la yandja onhele yedu opo tapa ka tungwa endiki lomalihafifo tali kala la andjuka nope na ongulu yokuningila omadeulo,” ta ti. Muma okwa ti okudja omudo 2025 omwedi Aguste fiyo Desemba 2026 elelo lodoolopa ola yandja eenhele domadu 121 kehangano loShack Dwellers Federation opo li tungile oshiwana omaumbo.
Shack Dwellers Federation ehangano limwe tali dana onghandangala moshilongo okutungila ovanhu omaumbo ovo ve na oyuuyemo i li pedu.
Modoolopa yaKongo namo ovanhu va mona omauwa okupitila mehangano loShack Dweller Federation. Muma okwa ti natango elelo lodoolopa ola yandja eenhele dedu 10 kovanangeshefa tave ya okuninga eengeshefa mOkongo nelalakano lokuyambula po odoolopa.
“Osha fimana ngeenge modoolopa yetu mu na ovanangeshefa va yooloka opo ete omayakulo popepi noshiwana,” ta ti.
Okwa yelifa ta ti Okongo odoolopa ya mangulukila ovanangeshefa va yooloka tava di koitukulwa ya yooloka ile kondje yoshilongo.
“Ovangashefa natango otava yandje eemhito doilonga kovanyasha ve li modoolopa ile tava di komikunda,” ta ti. Okwa weda po ta ti ovanangeshefa 450 ove li momusholondongo va teelela okupewa omadu konima eshi va ninga omaindilo.
“Mopaife ngaha ovanhu 1 302 ove li momusholondondo va ninga omaindilo va teelela okupewa omadu,” a weda po.
-fhamalwa@nepc.com.na