OSHAKATI – Elelo lyodoolopa yaShakati olya gongela oshimaliwa shi vule N$800 000 esiku lyohungi lyoExpo ndjoka ya ningwa mehuliloshiwike.
Oshimaiwa shoka osha thiki mpoka omolwaanangeshefa aashona yomomundhingoloko gwOshakati ya yi moondjato dhawo ya nanena.
Aanangeshefa aashona oya popi kutya otaya yambidhidha ngaaka okukwathela elelo lyondoolopa lyi longekidhe omauliko gomazimo nogiipindi, oshoka uuwanawa otau galukile kuyo ongaanangeshefa aashona.
Mayola gwondoolopa yOshakati Leonard Hango okwa ti, ohungi ndjoka okwa li ya ningilwa okugongela oshimaliwa okuyambindhindha oshiindingili oshinene, shoka hashi ningwa omumvo kehe.
“Omauliko gomazimo ihaga ulike ashike omazimo, ihe ohaga gongaleke aalandithi yiilandithomwa ya yooloka oshowo omauliko guunongo no mahangano ga yooloka,” ta popi ngaaka.
Ta ti, aanangeshefa aashona naanene ya yoolooka okwa li ya uvaneke okugandja iimaliwa okuyambindhindha omauliko gomazimo ngoka taga ka tameka mehuulilo lyomwendhi nguka.
Hango ta ti, oshimaliwa shoka ashihe osha thiki N$800 000, no tashi kalongithwa okuyambindhindha okulongekidha oomauliko gomazimo ngoka.
“Ohashi pula oshimaliwa oshindji okulongekidha omahala ga longekidhwa nawa, gaalandithi, oshowo iikwawo oyindji okugandja omayakulo mo mauliko gomazimo oshowo giipindi’’ ta popi ngaaka.
Omuprimaminista okwa tundula aanangeshefa aashona sho ya yambindhindha naashoka yena po, no kwiithana aanangeshefa aashona ya kutheko oshiholelwa oshiwanawa.
Ta ti oongeshefa ndhoka dha kwathele ngaaka otadhi humitha komeho eliko momundhingoloko gwOshakati momukalo omwaanawa.
“Okukondjela noku yambula po eliko, okuna ashike etompelo limwe ndyoka lyoku hwepopaleka onkalo yoshigwana,” ta ti ngaaka.
Ta ti, omahangano omanene noongeshefa odha pumbwa okushininga onkalo ndjiigilile okukundathana nkene yena okuyambula po noku humitha komeko eliko miitopolwa ayihe moshilongo.
Tagwedha po kutya okupitila momukalo ngoka, oompito dhiilonga otandhi ka holoka, okukandula po omaupyakandhi gataalela oshigwana.
Ngurare ta ti, aanangeshefa aashona oyo omeho gonakuyiwa yoshilongo.
vkaapanda@nepc.com.na