Aanandholongo 31, oya iyaka mondholongo yosasiyona yopolisi yedhina Menias Brian Lubuto muule womimvo 10.
Mokati koonakwiiyaka mondholongo sigo oompaka aantu owala yaheyali oyo ya monika.
Omukuluntu gwopolisi moshitopolwa shaZambazi Andreas Silelo sho a li ta ningile aatoolinkundana oshigongi okwa koleke kutya oshigwana oshi na uumbanda oshoka kashi shi kutya aantu mboka yi iyaka mondholongo moka oye li peni.
“Ashike itandi ti, aantu ayehe oye na uumbanda oshoka ope na yamwe mboka ya edhilila aanandholongo mboka. Kandi shi kutya aantu mboka ya edhilila aanandholongo mboka nayo oye na uumbanda oku ya lopota oshoka oya nika oshiponga, nenge itaya lopota oshoka aapambele yawo,” ta popi ngaaka.
Okwa popi kutya konima kwa ningwa omakonakono sho aanandholongo ya li yi iyaka mo, osasiona ya yaMenias Brian Lubuto oya pumbwa okulongululwa.
Ta gwedha ko wo kutya aapolisi oya pumbwa okukala taya longo yi itula mo okukwashilipaleka kutya aanandholongo itaya iyaka mo.
“Osasiona ndjika oya pumbwa aapolisi ya gwedhwa po. Pamulandu gwopolisi, mpoka tapa holoka iimbuluma yi li pombanda nopwa nika oshiponga opwa pumbwa aapolisi oyendji,” ta ti ngaaka.
Shilelo okwa indile oshigwana shi longele kumwe nopolisi okulopota aantu mboka yi iyaka mondjeedhililo.
Omupopiliki gwopolisi moshitopolwa shaZambezi Kilo Manyando okwa ti nkene osasiona ndjoka ya tungilwe momumvo 2014, aanandholongo 31 oyi iyaka mo, ihe yaheyali ashike ya mangwa po sigo oompaka.
“Shika osha eta uumbanda maakalimo osho wo mboka yopomidhingoloko dhi li popepi oshoka pamwe natango taya ka tsikila okulonga shoka sha li she ya tulitha mondjedhililo,’’ ta popi ngaaka.
Kilo okwa ti okwiiyaka kwaanandholongo nako otaku ngushupaleke oshitopolwa, naatalelipo, itaya kala we ye na ohokwe okuya koshitoshitopolwa omolwuumbanda.
Okwa ti, oshigwana osha kala nokupula osasiona ndjoka yi longululwe e tayi gwedhelwa woo aapolisi. –vkaapanda@nepc.com.na