Omukulupe nokatekulukadona va kwatwa nomapangwe

Omukulupe nokatekulukadona va kwatwa nomapangwe

Omukulupe weedula 69 nokatekulu keedula 20 ova kwatwa po molwaashi va hangika nomapangwe meumbo lavo kodoolopa yaRehoboth efimbo lokomatango Etitatu.

Omupopiliko wopolifi koshitukulwa shaHardap Senior Inspector Linea Heita okwa hokolola ta ti omapangwe okwa monika pefimbo lopolifi tai ningi oshikonga shokukandeka oimbuluma.

Okwa ti otava pangululilwa oshibofa shokulandifa oingangamwifi oyo inai pitikwa moshilongo.

Heita okwa ti oshitukulwa shavo osha didilika vali ovanafikola tava nu omapangwe unene modoolopa yaRehoboth noMariental.

“Ohatu lopotelwa lwoikando ya yooloka okudja keefikola ngeenge ovanafikola va hangika nomapangwe,” ta ti.

Okwa ti opolifi ohai ningi oikonga yokuyandja ehongo kovanafikola konima ngeenge va kwatwa nomapangwe.

Okwa kumaida oshiwana opo shi longele kumwe nokulopotela opolifi kombinga yovanhu tava landifa omapangwe molwaashi inashi pitikwa.

Oshiningwanima shikwao, omukainhu weedula 55 nomonakadona weedula 24 okwa li va kwatwa po molwaashi va hangika va kuna omapangwe meni lohofa yeumbo lavo koGroot Aub, oshivike sha dja ko.

Neudo okwa lopotwa natango omukulupe weedula 60 shaashi a hangika nomapangwe keengamba daNamibia naSouth Africa.

Opolifi oya hokolola tai ti omukainhu ou okwa li ta di koSouth Africa nokwa li ta kendabala okundjondjela epangwe moNamibia.

fhamalwa@nepc.com.na