TSOAXUBAMS – !Hū-omkhâis ministeris ge !aedana nî ǀirise, !nande nē ǀgam ǀkharikha ǁga ge sîǂui, ǁnāpan ge ǀgowadi !aedana nēpa a khoraǂuisens khao!gâ. 

Ministeris ra mîsa !oan ge nē !aedana ǂgurose Homeb, Utuseb !âb hîa ǁaupexa 60 kilometerga !Gomenǁgamsa xu ǁgoeb !nâs tsî !Autsawises ǁhûi!nâharis, Hardap ǀkharib dis !nâ ge tsoatsoa. Ministeris di mîgowaba-aob, Romeo Muyundab ge ge mî, nē !aedanan aibe ǁkhanamas !haros !nâ hâsa tsîn ge Gobabeb Ôa!nâdi Sentersa xu Kuiseb !āb ǀnomamma-ū, 50km xa a !nāsa gaxusiba !khoe hâsa, Namib Naukluft Parka-ū, Erongob tsî Hardap ǀkharikha hoakha tsâǀkhā hâse. “Hardap ǀkharib !nâs ge !aedan ǀirisa Alt Duwiseb !â!âb !nâ tsoatsoa, ǁaupexa 65km !Autsawisess xu !khawagas aiǂoas Helmeringhausens ǁga garuse. 

Nē khoraǂuisens ge 15 !garo!ādi hîa ǀhaehe rasa !oa 300km tsî 400km ǁaegu hâ !nūsiba !khōǂgā hâde ge tsâǀkhā,” tib ge Muyundaba ge mî. ǁîb noxopa gere mîs ge, ǁaupexas nē khoraǂuisensa 5 000 tsî 10 000 ǁaegu hâ !aedana !khōǂgā hâ !khaisa. ǁNaetisase da a ǂan !khais ge !aedan ra !hanaǂûn tsî haiǂûna ǂû tsî ǁnās xōǀkhā !û-aiga hîgagasa. Hanan ga ǁaeb ai !khō!nom!nomhe tama i, on ge !hanaga ra ǂkhôa. 

Ministeris di ssenaon ge ǀiridi ǀkha a ǁaxa tsîn ge nēs xōǀkhā ǂgari-aon tsî ǁnā ǀhûhâsigu ǀkha ǀhao hâse !haesen mâpan nē !aedana garu !khaisa n ǂanse, !nūseba xu ra mû tsî !khōǁnâ dīgauga ge !amǂgā. 

Ministeris ge !kharaga !âǀhuru-aon, aiǁgause ministeris ǂnamipeb dis khami ge ǂgaeǀgū. ǁnā ǁkhaubasa tsî ministeris mā-ams ose a ǂgâhe ǁoa !âgu !nâ nî !hae huiba māse, ǂhâbasa i apa. 

ǂGari-aon tsî ǀhûhâsigu ǁanin ais ge ǂgansa ge dīhe, in ǁkhowa-amsa mûdi tsî ǂgaedi ǀkha hoaǁae hâ, !gōsase ǁnā tsâǀkhāsa !âgu !nâ tsî !haese ǁkhāti ǁîn ǀgūse mâ !Hū-omkhâis Direktorats Berodi tawa !nuri. Muyundab ge mîs ge, ministeris nē khoraǂuisensa ǁkhaes !aroma a ǂhomisa !khaisa, ǀgaisa ǂkhôab !hanagu tsî !û-aigu hâ tides ǁkhaubas ase.