Ohamba yOvakwanyama Martha Mwadinomho yaKristian Nelumbu okwa kumaida oshiwana opo shi xulife po okuvaka omapungu, oitila nomakunde momapya avakwao.
Okwa ti okwa lopotelwa kombinga yovanhu tava nyenyeta moshitunda shaUkwanyama kutya omapya avo otaa longelwa ominyonena kookalyamupombo.
“Neudo odula oya loka nawa, omunhu keshe okwa li e na omhito yokulima epya laye,” ta ti.
Mwadinomho okwa ti nashi ninge exulilo molwaashi itashi ulike efano liwa kombinga yovanhu tava vake omakunde.
“Omunhu ngeenge ke na sha na pule ndele hakuvaka. Okupula ekwafo itashi ti kutya omunhu okwa puka,” ta ti.
Ohamba oya ti ovanhu vamwe okwa li ashike hava pitile eengula keendingosho pefimbo vakwao tava longo momapya ndele paife ove lininga ookalyamupombo tava vake.
Mwadinomho okwa ti ina hala okuuda ovanhu tava longo oimbuluma moshitunda shaye.
“Inamu vaka po vali oimuna yovanhu tamu i shingile moAngola. Kaleni tamu lilongele vene nokukala mu na omaliko eni,” ta ti.
Okwa ti ohashi mu hafifa ngeenge moshitunda shaUkwanyama mu na ovanhu ve na elongelokumwe nombili.
“Ounona nava tekulilwe oukriste nokukala va longwa nghene ve na okufimaneka ovakulunhu,” ta ti.
Okwa lombwela ovadali opo va twe ounona vavo omukumo wokukala mofikola molwaashi ehongo ola fimana.
Ohamba oya ti ngeenge oshiwana oshi na oupyakadi nashi shivifile oovene vomikunda ile omalenga taa wilike oikandjo.
Mwadinomho okwa ti omalongekido otaa ende nawa okukala va ninga oshivilo shomaongo momafiku 10 Mei 2025.
“Oshiwana otashi holoka momwaalu muhapu okutwala omaongo kOuhamba,” ta ti.
Okwa ti okwa teelelwa ovaleli veendodo da yooloka tava ka fika koshivilo shomaongo.
“Ovanhu inava pumbwa okuetelela oilwifo molwaashi oku na eameno la wana. Omunhu keshe okwa manguluka okufika koshivilo eshi,” ta ti.