ǀGam khoen ge hāǀaro rase Rundus !nâ ǂoa ge wekheb Donertaxtsē !khōsis !nâ ge ūhe hîa ǁnān ǂgui miljunde !khōǂgā hâ mari!naris ǁhōb, Bank Windhoeks di Opuwos ǁnâub tawa ge ai!â gere oa Satertaxtsēs ai a hâb di ǁhōb !nâ ra ǂâisāhen dib !nâ.
Nē sa ge a !aromas ge Namibiab ǀawa!namn ge tsautamase ai!âkam sîsenaob nē marisâuǂgaes dib, Nico Radebeb hîa nē ǁhōb !nâ ǁîba a dana ǂâisāherab hîa noxopa nētsēs kōse !khōsis !nâ ūhesa ra ôa-amheb ǂaib ai hâ is khao!gâ.
Nē ǂâisāhe ra disi khoen ǁnā marisâuǂgaes mari!narib hîa ǂguro !nurigu !nâ N$200 miljuns ai gere ǀhapiǂnûiǀkhāhena xun ge ǁkhaisana a Rundus di ǁnāpan !gau ra ǀgamna a Opuwos di hîa.
Nausas, Bank Windhoeks di !khōdanara direkters Beronice Hansa ge mî, nē ra ǁkhuihe maris N$2 miljuns ǀguisa ī tise.
“Hâ a ǂoa!nâs ge N$2 miljuns xa ǀoro, kai gangans sîsenaon di ǂkhaikari hâs tsî marisâuǂgaes !nâ hâ ǁkhaubas tsî ǁaeb ai ǁkhaes di sîsenǀgaugu !aroma.
ǀGuis khami ī !oabade ra māhe khoen di mari-i tsîn nē !nae!khais xa tsâkhāhe tama hâsa,” tis ge Hansa ǂoa ge wekheb tsoatsoas !nâ ge mî. ǂOa ge wekheb di Donertaxtsēs aib ge !nāsa !gāsasiba ǂhanu !gôab mâtikō maris ge !narihes diba gere ǂgaoǀkhāhe, soab aib ge Bank Windhoeks di mîgowaba-aob, Samuel Linyondiba ge mî, ǁîn noxopa ǂguron ge māǂui !nurib ai mâsa tsîn !aruǀî ôa!nâdi nî dītoahes kōse nēs ai mîǂgā ǁkhā tide !khaisa.
ǁNā soab aib ge New Eraba ǂoa ge wekheb Donertaxtsēs ai ǁawosasiba ǀunis ai ge !khōsis !nâ Rundus !nâ a ūhe khoera ǂnamipe, Kavangob Aiǂoas ǂnûǁkhaeba ra ǀkharisi danab, Eino Nambahuba xu hō.
“Rundus !aroma gere noxopa ôahe ǀgam ǂâisāhera khoera ge !khō ge ūhe. Nēs ge ǁnān hîa !khōsis !nâ Kavangob Aiǂoas ǀkharib !nâ ge ūhena ǁkhaisas ai go hā-ū.
ǀGui-i ge Rundus ǁnâub Bank Windhoeks dib tawa-i marisa marisâuǂgaes !nâ ǂganaga ra ǂgae hîa ǁgoaga ge !khōhe, nau-i ge ǁîb oms hîa Kaisosi ǁanǁguib !nâ mās tawa tsē!gâǁaeb ai!â !khōsis !nâ a ūhe hîa,” tib ge Nambahuba ge ǁawoǁawo. Hoa ǂâisāhera khoen ge ǂoa ge wekheb Fraitaxtsēs ai aibe Rundus ǁnâu!gâ!khaib ai!â ge ǂhai, ǁnāpaxun Kunene ǀkharib hîab nē ǁhōba ge a !nuri!gâheb ǁga nî doe-ūhese. ǀAwa!namn di !nurib ra mîsa !oab ge Rebebeba nau khoena sîseneb nî māse !garo!ās ai ǀgūǀkhā ni tsî ge mîba in hoana Bank Windhoeks ǁnâugu tawa marisâuǂgaes !gôade ǁkhowa-am îb ǁnāpa ǁîn ǁkhâkorobe !khō!oamaride mātareǂgāba ni. ǁÎn ge !kharaga !gôagu di marina ge mātareǂgābahe hîa N$200 000 tsî N$500 000 ǁaegu ge hâ ina. Nē soab ais ge Bank Windhoeksa N$20 000 marisa ǁnā khoe-i hîa Rebebeb di !khōsis !nâ ūhesa ga īǁkhā kai-e mādawa-ams ase ra māǂui.