Auleria Wakudum
Olutu lomusamane weedula 87 oo a li a kungululwa po komeva nohauto yaye ole lituwa momulamba waDorado, mOvenduka.
Eshi osha kolekwa komupopiliko wopolifi Chief Inspector Elifas Kuwinga ta ti oshiningwanima osha ningwa Etivali lwopo 15h37. Otaku hokololwa vati omulumenhu ou a li ta kendababala okutauluka omulamba novatwaalelwa vatatu moAusblick moshilandopangelo.
Nakufya okwa tongololwa oye Theodor Volker.
Kuwinga okwa holola ta ti motuwa omwa li yo ovatwaalelwa ovakainhu vavali veedula 47 no 49 pefimbo ya li tai shingwa kunakufya.
“Nakufya okwa li ta twala ovakulukadi ava pomafikameno eebesa eshi oshiningwanima sha ningwa. Omanga ta kendabala okutauluka omulonga mepandaanda laSean McBride moAusblick, otuwa oya kanghama nokuli inai hala vali okuya komesho nomakufikufi omeva okwa tameka oku i kungulula po,” Kuwinga ta ti.
Kuwinga okwa weda po ta ti ovakulukadi vavali ova pondola okudja mo mohauto ashike nakufya oo a li omushingi okwa fyaala mo ndele ta kungululwa po notuwa.
Otuwa vati oya ka kanghama popepi nonhopa lwomondjila hai ifanwa Robert Mugabe Avenue.
“Otuwa oya kungululwa okudja kepandaanda loSean McBride ndele tai pitile mepandaanda loJason Wanahepo Ndadi noya ka hangika ya mbilika mondjila yakula yoRobert Mugabe Avenue,” Kuwinga ta ti.
Kuwinga okwa ti olutu inali hangika mohauto nopolifi oya twikila okukonga nakufya. Olutu la Volker ole lituwa momulamba moDorado Park.