Minista woikwameni neameno lokeengaba Lucia Iipumbu okwa ti eemhango dokuamena ovanadolongo, opo ashike di li nande eelopota de lihanena moshiwana kutya ove li mo va taalela omahepeko e lili noku lili, omo mwa kwatelwa noopamilele.

Iipumbu eshi okwe shi popya pefimbo ta nyamukula omapulo komutumba wopashiwana, oo a li a pulwa koshilyo shomutumba wopashiwana Vilho Ihemba.

Ihemba okwa li a pula Iipumbu omapulo e na sha nonghalo yovanadolongo ngeenge tashi ya pomahepeko opamilele, okunyekafana nokulikufa oinima pokati kovanadolongo osho yo omalidengo osho yo okweeta oilwifo noinima aishe ei ya ngabekelwa mokakuma.

“Okudja ashike mo 2023 fiyo 2026 oibofa ei ya lopotwa i na sha nokulidengela modolongo osho yo okunyekafana oinima oi li 17, oibofa yomahapeko opamilele 24 omanga okweeta oingangamwifi, osho yo oilwifo nakeshe osho sha ngebekwa modolongo i li 11,” Iipumbu ta ti.

Okwa yelifa kutya ovapolifi koitukulwa aishe moshilongo ove na oshinakuwanifa shokuhada eesela dovanodolongo, nokukufa mo keshe eshi shi li mo sha ngabekwa, osho yo okuyandja omakwafo noma ameno aeshe va pumbwa.

“Natango opena yo oveta yakula i na sha nokuhada osho yo okulifa ovapolifi tava etele ovanadolongo oinima ei ya ngabekwa modolongo efimbo alishe,” ta ti.

Oimaliwa ei hai kala ya hangika kovanadolongo meni leesela vati ohai tulwa ashike mombaanga yepangelo.

Ovanadolongo ava hava kala va hangika noinima ei vati ohava ka pewa ehandukilo lavo le likalekelwa, omanga ovapolifi ava va tauluka oveta navo hava pewa omahandukilo avo.

-taimihaihambo2000@gmail.com