Okwa lopotwa omukulupe womulumenhu weedula 90 a xulifa eshi e limangelekela koshi yomuti u li mepya laye. 

Oshiningwanima eshi osha ningwa mexuliloshivike komukunda Omapumba moshi tukulwa shaHangwena efimbo loufiku. Nakufya okwa tongolwa oye Jeremia Paulus omukalimo womukunda Omapumba. Nakufya okwa fiya po omukanda a shanga mo kutya eumbo nali pewe umwe womovana waye ndele ta shange mo va li nomadina ovanhu ovo tava pewa eengobe daye. 

Omukulunhu koshikondo shokukonakona oimbuluma wopolifi moshitukulwa shaHangwena Melanie Mburu okwa koleka onghundana ei. Opolifi oya hokolola tai ti omukulupe ou okwe lituwa kovaneumbo vaye e li meemhango koshi yomuti mepya. 

Umwe womukwapata waye Johannes Paulus okwa koleka ta ti Jeremia ka li ta ulike e na omadidiliko okulimangeleka. 

“Nafye otwa kumwifwa koshiningwanima eshi shefyo lamumwameme,” ta ti. 

Okwa hokolola ta ti efiku olo Olomakaya, Jeremia okwa penduka ndele ta djala, ndele ta uka mepya. 

Okwa ti okwa kala ta endaenda mepya ndele ta shuna meumbo. 

Okwa hokolola ta ti eshi a shuna meumbo mboli okwa ila ongodi. 

“Ovaneumbo inave mu mona eshi a shuna mepya ashike okwa ongolwa eshi ovanhu tava li omusha,” ta ti. 

Okwa hokolola ta ti okwa ya mepya ndele ta ka shikula oimuna yaye nokudja opo okwa fiya ounona koimuna. “Konguloshi lwopotundi 20h00 otwa ka limbililwa kutya oku li peni “ ta ti. 

Okwa ti ova kufa eetoshe ndele tava i mepya va ka konga omukulupe. Okwe lituwa eli meemhango koshi yomuti. 

Okwa fiya po omukulukadi waye nouona. -fhamalwa@nepc.com.na