ONDANGWA – Kakukutu komatanga gopolisi Joseph Shikongo okwa ti oya taalela uupyakadhi waapolisi yamwe haya hupu po ashike noN$200, uuna ya kwata oshimaliwa shokomwedhi.

Shikongo okwa popi ngaaka pethimbo a li ta popitha nokulongekidha aapolisi 1 038 ye li komadheulo koRuben Danger Ashipala kOndangwa mOmandaaha.

“Aapolisi yamwe ohaya hupu po ashike nokamaliwa okashona, nando N$200 omolwoongunga yi itula mudho, onkene otandi mu kumagidha mwaaninge iihakanwa,” ta kumagidha ngaaka.Ta ti, omahangano gamwe ngaashi gooLetshego ohaga hakana mboka aape, ihe ngele owa yi mokana kawo, ku na siku wu ze mo.Shikongo okwa ti, yamwe oye na edhilaadhilo lyokuthiga po iilonga omolwoondjo, ya hala openzela.Okwa lombwele aapolisi mboka ta ti, naya kuthe ko iilonga yawo yi itula mo, naya ka gandje omayakulo moshigwana ngaashi shi na okuningwa, omikalo osho wo elongelokumwe inali ya kala kokule.“Kaleni aapolisi ye na elandulathano, ye na omikalo yo taya gwanitha po iilonga yawo,” ta kumagidha ngaaka.Shikongo okwa kumagidha wo ta ti naya ka tunge omagumbo gawo, ya tameke okutunga omanga aashona.“Ihashi pula okukwata oshimaliwa oshindji opo gumwe a tunge, ihe aantu ayehe ohaya tameke nokashona,” ta popi ngaaka.Ta ti, ino tegelela wu thike poomvula 40 opo wu tunge, ta ti ito ka gwanitha.

Shikongo okwa kumagidha ta ti, naya ka kwathele aakuluntu yawo uuna ya tameke okulonga.“Ngele mwa tameke okulonga, kwateni oshimaliwa sheni nawa, hakulanda oongodhi dhooI-Phone, nokuza koohiila dhondilo,” ta kumagidha ngaaka.Aapolisi mboka taya dheulwa oya li ya tameke omumvo gwa ziko noya tegelelwa okumana nuumvo kehulilo lyaMai.

Omadheulo ga faathana otaga ningwa ngaashi koPius Joseph Kaundu kOmaheke osho wo koSimon Mutumba Mutumba koZambezi.Omadheulo agehe kumwe oge na aapolisi taya dheulwa ye li 1 800.

-vkaapanda@nepc.com.na